Qaterli isikke shaldyqqandar sany azaımaı tur.
Qazaqstanda jyl saıyn 39 myńǵa jýyq adam qaterli isikke shaldyǵady, 14 myńnan astam adam qaıtys bolady, onkologıalyq esepte 200 myńnan astam qazaqstandyq tur. QR-nyń ólim-jitim kórsetkishinde onkologıalyq aýrýlardan bolatyn ólim ólim-jitim qurylymyndaǵy úshinshi oryndy alyp tur, dep habarlaıdy Almaty-akshamy.kz Qazaq onkologıa jáne radıologıa ǴZI-dyń baspasóz qyzmetine silteme jasap.
«2022 jyly biz QR Úkimetiniń qaýlysymen bekitilgen Qazaqstan Respýblıkasynda onkologıalyq aýrýlarmen kúres jónindegi 2018-2022 jyldarǵa arnalǵan Keshendi jospardyń mindetterin iske asyrýdy aıaqtadyq. Keshendi jospardyń maqsaty qaterli isikterdiń aýyrtpalyǵyn azaıtý boldy. Onkologıalyq aýrýlarmen kúres jónindegi 2018-2022 jyldarǵa arnalǵan Keshendi jospardyń is-sharalaryn iske asyrý kezinde qaterli isikterden bolatyn ólim-jitimniń tómendeýiniń oń úrdisi bar (2018 jyly – 100 myń turǵynǵa shaqqanda 78,1, 14 369 jaǵdaı, 2022 jyly – 100 myń turǵynǵa shaqqanda 66,4, 13 033 jaǵdaı), kórsetkishtiń 9 paıyzǵa tómendeýi baıqaldy. Ólim-jitimniń tómendeýi barlyq aımaqtarda tirkelgen», – dedi QR DSM shtattan tys bas onkology, «Qazaq onkologıa jáne radıologıa ǴZI» AQ basqarma tóraıymy Dılára Qaıdarova Almatydaǵy ótken Búkilálemdik qaterli isikke qarsy kúres kúnine arnalǵan baspasóz máslıhatynda.
2022 jyly elimizde qaterli isiktermen syrqattaný 100 myń turǵynǵa shaqqanda 199,2 boldy, bul degende 39 096 jaǵdaı, aldynǵy jylǵa qaraǵanda syrqattanýshylyqtyń 4,7% – ǵa ósti.
Onkologıalyq aýrýǵa shaldyǵý boıynsha birinshi orynda dástúrli túrde sút bezi obyry, ekinshi orynda – ókpe obyry, úshinshi orynda – kolorektaldy obyr, tórtinshi orynda – asqazan obyry tur.
Ólim qurylymynda birinshi orynda – ókpe obyry, ekinshi orynda – asqazan obyry, úshinshi orynda – kolorektaldy rak, jáne tórtinshi orynda – sút bezi isigi tur.
«Qazirgi ýaqytta qaterli isik aýrýyn erte kezeńde anyqtaý 29 paıyzdy quraıdy. Iaǵnı, árbir úshinshi naýqas bizge 0 jáne 1 obyrdyń satylarymen keledi, bul jalpy bizdi qýantady. Jaqsy kórsetkish – onkologıalyq aýrýlardan bolatyn ólim-jitimniń tómendeýi. Sonymen qatar, bes jyldyq ómir súrý kórsetkishi jaqsardy. Qazir dıspanserlik esepte 200 myńnan astam onkologıalyq naýqas bolsa, olardyń 55 paıyzy 5 jyl jáne odan da kóp ómir súrýde. Bul - jaqsy kórsetkish. Degenmen, barlyq óńirlerde onkologıalyq aýrýlardyń sany artqan. Mysaly, 2018 jyly bizde 32 myńǵa jýyq jańa qaterli isik aýrýy anyqtalsa, bıyldyń ózinde onkologıalyq aýrýlardyń 39 myń jańa jaǵdaıy tirkeldi», – dedi Dılára Qaıdarova.
QR-da onkologıalyq kómekti jetildirý Qazaqstan Respýblıkasynyń Densaýlyq saqtaýdy damytýdyń 2026 jylǵa deıingi tujyrymdamasyn iske asyrý sheńberinde júzege asyrylady.