Búgin jańa oqý jyly bastaldy
2021-2022 oqý jylynda el mektepterinde 3,6 mln bala bilim alady. Onyń 380 myńǵa jýyǵy birinshi synypqa barady, dep habarlaıdy Almaty-akshamy.kz. QazAqparat saıtyna silteme jasap.
QR Bilim jáne ǵylym vıse-mınıstri Sholpan Karınovanyń ortalyq komýnıkasıalar qyzmetinde aıtqan málimeti boıynsha, jańa bastalǵan oqý jylynda 7 400 mektepte 3,6 mln oqýshy dástúrli formatta sabaq oqyp bastaıdy. Onyń ishinde 380 myńǵa jýyq oqýshy mektep tabaldyryǵyn birinshi ret attap otyr.
Al oqý jylynyń aıaǵynda úlken ómirge qadam basatyn túlekter sany –165 myń. Jyl boıynda 3,6 mln oqýshyǵa jalpy jıyny 367,7 myń muǵalim bilim beredi. Onyń ishinde 12 myńnan astam muǵalim ustazdyq eńbek jolyn endi bastaǵaly otyr. Ulttyq bilim berý derekteri boıynsha, elimizde 3 aýysymmen bilim beretin 300-den astam mektep bar. Bul eldegi barsha mektepterdiń 5 paıyzyna teń. Basqasha aıtsaq, oqýshylardyń 19 paıyzy úsh aýysymmen oqýǵa májbúr.
Bilim jáne ǵylym mınıstrliginiń baspasóz qyzmeti bergen málimetke súıensek, táýelsizdik jyldary qazaq tilinde oqytatyn 965 mektep iske qosylyp, jalpy sany 3733-ke jetken. Bul jalpy mektepterdiń 54%-yna teń. 1991 jyly qazaq mektepteriniń sany 2768 bolatyn. 30 jylda qazaq tilinde bilim alatyn balalardyń úlesi 32 %-dan 66 %-ǵa artqan. Bıyl mektep qabyrǵasynda bilim alatyn 3,6 mln balanyń 2 223 455-i memlekettik tilde sabaq oqıdy degen sóz. «Ana tilinde oqıtyn ulty qazaq balalarynyń sany búgingi tańda 85%-dy quraıdy.
Mektep jasyndaǵy ulty qazaq balalardyń sany - 2 568 068. Olardyń 2 173 141-i qazaq tilinde oqıdy», - delingen vedomstvonyń málimetinde.