Memlekettik baǵdarlama arqyly jumys tapqandar sany 300 myńnan asty.
Jyl basynan beri jumyssyz júrgen qazaqstandyqtar «Eńbek» baǵdarlamasy arqyly óz kásibin tapty, dep habarlaıdy Almaty-akshamy.kz.
«Aǵymdaǵy jylǵy 1 qyrkúıektegi jaǵdaı boıynsha, 451,6 myń adam Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan «Eńbek» memlekettik baǵdarlamasynyń (budan ári – «Eńbek» memlekettik baǵdarlamasy) qatysýshylary boldy. 328,5 myń adam jumysqa ornalastyryldy, onyń 200,7 myńy turaqty jumysqa turdy», – delingen Eńbek jáne halyqty áleýmettik qorǵaý mınıstrliginiń baspasóz qyzmetiniń habarlamasynda.
Resmı málimet boıynsha, baǵdarlamanyń birinshi baǵyty aıasynda qysqa merzimdi kýrstarǵa 15,2 myń adam jiberilgen. 5,5 myńnan astam adam óz isin ashý úshin jeńildikti mıkrokredıtter, al 20,2 myńy qaıtarymsyz memlekettik granttar alǵan.
Sýbsıdıalanatyn jumys oryndaryna 155,7 myń adam jumysqa ornalastyryldy, onyń ishinde: áleýmettik jumys oryndaryna 16,6 myń adam; jastar praktıkasyna – 21,4 myń adam; qoǵamdyq jumystarǵa – 117,4 myń adam.
«Eńbek resýrstarynyń utqyrlyǵy sheńberinde 1 342 otbasy nemese 4 571 adam qonys aýdardy, onyń ishinde 1 952 adam eńbekke qabiletti jasta bolyp tabylady. Onyń ishinde 1 329 adam jańa turǵylyqty jerinde turaqty jumysqa ornalastyryldy jáne 111 adam kásipkerlik qyzmetpen aınalysady, 5 adam oqýǵa jiberildi»,– dep habarlaıdy mınıstrlik mamandary.
Mınıstrlik ókilderiniń sózine júginetin bolsaq, 2020 jyly «Eńbek» memlekettik baǵdarlamasyna 649 myń adam qatysty. 437,3 myń adam jumysqa ornalastyryldy, onyń 319,2 myńy turaqty jumysqa turdy. Jappaı kásipkerlikti damytýǵa 12,7 myń mıkrokredıt jáne jańa bıznes-ıdeıalardy iske asyrýǵa 44,9 myń qaıtarymsyz memlekettik grant berildi.