«BǴM LIVE» jobasynda BǴM Mektepke deıingi jáne orta bilim komıteti tóraǵasynyń orynbasary Sapýra Tólekova 24 qańtardan keıingi oqý formaty týraly túsindirip berdi, dep habarlaıdy Almaty-akshamy.kz
Koronavırýstyq ınfeksıanyń taralýynyń aldyn alý boıynsha qurylǵan VAK-tyń sheshimine sáıkes 2022 jyldyń 24 qańtarynan bastap oqytý formattaryna ózgerister engizildi. Buǵan deıingi shekteýler boıynsha Nur-Sultan, Almaty jáne Shymkent qalalaryndaǵy mektepter tolyǵymen onlaın formatta, qalǵan óńirlerde bala sanyna qaraı (600-ge deıin jáne 600-den asa kontıngent) ártúrli normalar qarastyrylǵan bolatyn.
Sapýra Tólekova el mektepteri 24 qańtardan bastap qandaı oqytý júıesine kóshetini týraly aıtyp berdi.
Birinshiden, balabaqshalar, mektepke deıingi mekemeler menshik nysanyna qaramastan shtattyq rejımde jumys isteıdi. Ata-ananyń ótinishi boıynsha bala balabaqshaǵa barady, al bara almaıtyn jaǵdaıda mindetti túrde tárbıeshisine eskertip otyrady. Ekinshiden, mektepterde jumys qalaı júrgiziledi? Eger mekteptiń jalpy oqýshylar sany 600-ge deıin bolsa, onda mektep dástúrli rejımde jumys isteıdi. Iaǵnı oqýshylar bilimdi mektepte synybynda otyryp alady. Al mektep kontıngenti 600-den kóp bolsa, onda bir aýysymda mekteptiń jobalyq qýatynyń 50%-yn qamtıtyn syıymdylyqpen shtattyq formatta oqytýdy uıymdastyrýǵa bolady, - dedi ol.
Onyń sózinshe, mektep 1000 balaǵa arnalǵan bolsa, onda birinshi aýysymda 500 jáne ekinshi aýysymda 500 balany qamtýǵa bolady.
Shtattyq rejım kezinde basymdyq bastaýysh synyptarǵa (1-4 synyptar) beriledi. Sebebi, bastaýysh synyptyń balalary jas erekshelikterine qaraı sıfrlyq resýrstardy, onlaın platformalardy qoldanýda qıyndyq týady. Eresekterdiń kómegi qajet bolady. Al ata-ananyń kóbi jumysta bolǵandyqtan, balalarda qıyndyq týýy múmkin. Sondyqtan balalardyń muǵalimnen betpe-bet sabaq alǵany mańyzdy, - dep atap ótti Sapýra Tólekova.
Al halyqaralyq mektepterde basymdyq 1-6 synyp oqýshylaryna beriledi.
BǴM ókili mekteptegi oqýshy sanyna baılanysty qaı synypty shtattyq, qaı synypty qashyqtan oqytý qajettigin mektep ákimshiligi derbes sheshe alady.