Almaty ákimdigi jańa saıabaqtar salý men jumys istep turǵandaryn rekonstrýksıalaý boıynsha qyzý jumys júrgizip jatyr. Bul týraly jumys sapary barysynda Almaty qalasy ákiminiń orynbasary Álisher Ábdiqadyrov málimdedi.
Jýrnalıserge Báıseıitova kóshesiniń boıyndaǵy aýmaqty abattandyrý jumysynyń aıaqtalýy kórsetildi. Jobany «Almatybasjospar» ǵylymı-zertteý ınstıtýty JSHS 2021 jyly ázirlegen, bul jer «belsendi» jáne «tynysh» aımaq bolyp ekige bólinedi. Belsendi aımaqta fýtbol jáne voleıbol alańy, ústel tenısi oınaýǵa arnalǵan alańy bar balalar jáne sport alańdary salyndy. Sonymen qatar, aýmaqta 1264 sharshy metrlik ekstremaldy sport túrimen aınalysýǵa arnalǵan qaladaǵy eń úlken skeıt alań quryldy, onyń elementi monolıtti temirbetonnan jasalǵan. Skeıt alańnyń eskızdik jobasyn «Almaty q. skeıtbordıng federasıasy» QB jáne halyqaralyq jarystarǵa qatysýshy kásibı sportshylar maquldaǵan. Onyń qurylysy barysynda sarapshylar skeıt alańyn paıdalaný tıimdiligin arttyrý jáne jaraqat alý qaýpin azaıtý úshin usynystar aıtqan. Mehanıkalyq zaqymdanǵan elementterdiń jıeginiń beriktigi men paıdalanýshylardyń qaýipsizdigin qamtamasyz etý úshin bolat profılmen nyǵaıtyldy. Skeıt alań samokat, rolık, skeıt, velosıped syndy ártúrli sporttyq jabdyqtarǵa arnalǵan
Ákimniń orynbasary atap ótkendeı, Báıseıitova kóshesindegi aýmaqty abattandyrýmen qatar, byltyrdan bastap QBTÝ men Oqýshylar saraıynyń janyndaǵy skverler rekonstrýksıadan ótti, Buqtyrma–Maılın kósheleriniń qıylysynda jáne Esentaı ózeniniń boıynda eki jańa saıabaq – «Aspan» quryldy.
«Ekologıany jaqsartý maqsatynda qala aýmaǵyndaǵy saıabaqtar men jasyl jelekterdiń sanyn kóbeıtip jatyrmyz. Qazirgi ýaqytta 2024 jyly qurylysy aıaqtalatyn 6 jańa jáne qoldanystaǵy 4 saıabaqtyń qurylysy qolǵa alyndy. Buǵan qosa, 2025 jyly paıdalanýǵa beriletin 12 jańa jáne qoldaǵy saıabaqtardyń jobalaý-smetalyq qujattamasy daıyndalyp jatyr», - dedi Álisher Ábdiqadyrov.
Týr barysynda BAQ ókilderi Jetisý, Túrksib, Alataý jáne Áýezov aýdandaryndaǵy jańa saıabaq aımaqtarynyń qurylys jumysymen de tanysty. Abattandyrý jobasyn ázirleý kezinde avtomatty júıeniń kómegimen jáne qajet bolǵan jaǵdaıda uńǵymalardy burǵylaý arqyly jasyl jelekterdi sýarýdy eskeriledi. Qazirgi tańda Almaty qalasy Ekologıa jáne qorshaǵan orta basqarmasy merdiger uıymmen birlesip 29 uńǵymany burǵylady, 500 myńnan astam aǵashty tamshylatyp sýaratyn 5 sý jınaǵysh salyndy. Aıta keteıik, jobany ázirleý kezinde turǵyndardyń qatysýymen mindetti túrde qoǵamdyq tyńdaýlar ótkiziledi.
Almatyda jalpy aýdany 977 ga bolatyn 542 saıabaq aımaǵy bar, onda shamamen 4 mln.jasyl jelek ósedi. 2025 jyly saıabaq aımaqtarynyń aýmaǵyn 1 157 gektarǵa deıin, 2030 jylǵa qaraı 1 457 gektarǵa deıin kóbeıtý josparǵa engen.