Bir jyl burynǵy kórsetkishterge qaraǵanda 6060 adamǵa kóbeıgen.
Japonıa Densaýlyq saqtaý mınıstrliginiń seısenbi kúni taratqan málimetine sáıkes, elde 100 jastan asqandar sany rekordtyq 86510 adamǵa jetti, dep habarlaıdy Almaty-akshamy.kz QazAqparat silteme jasap.
Mınıstrlik taratqan málimet boıynsha, bıylǵy jyldyń 15 qyrkúıeginde elde uzaq jasaǵan adamdar sany bir jyl burynǵy kórsetkishterge qaraǵanda 6060 adamǵa kóbeıgen. Ósim 51-shi jyl qatarynan saqtalyp keledi.
Uzaq ómir súrýshi 86 510 adamnyń ishinde áıelder 88,4 paıyzdy (76 450) qurap otyr. Bul ótken jylǵy kórsetkishten 5 475 adamǵa kóp.
1963 jyly Japonıada uzaq ómir súretinder sany 153 adam bolǵan, 1981 jyly bul kórsetkish 1000 adamnan, al 1998 jyly 10 myń adamnan asqan. Osynyń barlyǵy negizinen medısınalyq tehnologıalar salasyndaǵy jetistikterdiń arqasy ekeni atap ótiledi.
Shilde aıynda mınıstrlikten Japonıada ómir súrýdiń ortasha uzaqtyǵy 2020 jyly eki jynys ókilderi úshin rekordtyq sanǵa: áıelder úshin – 87,74 paıyz, er adamdar úshin – 81,64 paıyzǵa jetkenin málimdedi.
Japonıanyń ońtústik-batysyndaǵy Fýkýokanyń 118 jastaǵy (1903 jyly dúnıege kelgen) turǵyny Kane Tanaka – eldegi eń kári áıel. Ol Gınnestiń rekordtar kitabynda jasy eń úlken adam bolyp tanylǵan. Al 111 jastaǵy Mıkızo Ýeda – Japonıanyń eń kári er adam.