Ыстамбұлда түрік журналистикасының беделді оқу орны саналатын «Бахчелиевлер Айдын Доған кәсіби және Анадолу» техникалық лицейінде маңызды мәдени шара өтті. Бұл шара Қазақстан мен Түркия арасындағы мәдени және рухани байланыстарды нығайтуға бағытталған ерекше іс-шара болды.
«Alatau-Aqparat» медиахолдингінің фототілшісі, Қазақстан Журналистер Одағының мүшесі Самат Құсайыновтың «Ұлы даланың салт-дәстүрлері» /Türk Yurtlarında Büyük Bozkırın Kültürü/ атты фотокөрмесі Бахчелиевлер Айдын Доған кәсіби және Анадолу техникалық лицейінде ұйымдастырылды. Фотокөрме қазақ мәдениетінің байлығын, оның салт-дәстүрлерін, табиғаты мен адамдарын бейнелейтін көркем туындылардан құралды. Көрменің мақсаты — қазақ даласының өмір салтын, мәдениетін және рухани құндылықтарын түрік жұртына жеткізу.
Бұл іс-шараны ТҮРКСОЙ халықаралық түркі мәдениеті ұйымы мен «Alatau-Aqparat» медиахолдингі бірлесіп ұйымдастырды, бұл өз кезегінде мәдени мұраны бөлісуге және танытуға үлкен үлес қосқан маңызды қадамдардың бірі болды.
Кездесуге Бахчелиевлер аудандық ұлттық білім беру директоры Мұрат Карабулұт, лицей директоры Сердар Караташ, сондай-ақ орынбасарлар Гөнүл Айтекін, Хамит Дөнмез және Туғба Биллур қатысты. Олар қазақ мәдениетінің байлығын көрсететін осындай іс-шаралардың жастарға рухани және мәдени тәрбиеде үлкен мәнге ие екенін атап өтті.
Көрмеге қатысқан қатысушылар өз пікірлерін білдіріп, осындай маңызды мәдени іс-шараның жастар мен қоғам үшін маңызы зор екенін атап өтті.
Мұрат Карабулұт, Бахчелиевлер аудандық ұлттық білім беру директоры, былай деп атап өтті:
«Бұл көрме қазақ халқының мәдени мұрасын, оның бай салт-дәстүрлерін және өмір салтын көрсететін өте ерекше және маңызды шара болды. Мұндай көрмелер жастардың мәдени дүниетанымын кеңейтеді және басқа халықтардың рухани құндылықтарын терең түсінуге мүмкіндік береді. Түрік жұрты мен қазақ халқы арасындағы мәдени байланыстарды нығайту біздің ортақ болашағымыз үшін аса қажет».
Сердар Караташ, Бахчелиевлер Айдын Доған кәсіптік және техникалық Анадолы лицейінің директоры:
«Мектебімізбен жасалған сәтті ынтымақтастық пен керемет көрме үшін "Alatau Aqparat" медиа холдингінің жетекшісі @erzhan_kalymbai, фотоөнер шебері @samatkusaiynov және көрменің ашылуына қатысып, бізді құрметке бөлеген аудандық ұлттық білім беру директоры @murat.karabulut.3458 мырзаға алғысымызды білдіреміз».
Көрме, сондай-ақ, Түркиядағы мәдениет пен журналистика саласында білім алып жатқан жастарға қазақ елінің салт-дәстүрлері мен мәдениетін жақыннан тануға мүмкіндік берді. Бұл шара түрік және қазақ халқының мәдени байланысын нығайтып, болашаққа деген ортақ көзқарасты қалыптастыруда маңызды орын алды.
- Мен үшін қазақ мәдениетін Түркиядағы көрермендерге ұсыну – үлкен мәртебе. Әсіресе, бұл көрмені Ыстамбұлдағы беделді оқу орындарының бірінде өткізу – қазақ халқының салт-дәстүрлері мен рухани мұрасын шет елдерге паш етудің керемет мүмкіндігі. Түрік және қазақ халықтары тарихта бір-бірімен тығыз байланысты, біздің рухани және мәдени құндылықтарымыз ортақ. Осы көрме арқылы біз бір-біріміздің мәдениетімізді тереңірек түсініп, әрі қарайғы ынтымақтастыққа үлес қоса аламыз деп сенемін. Жастарға қазақ мәдениетінің ерекше сәттерін көрсету мен үшін үлкен жауапкершілік әрі мақтаныш болды. Мәдениет арқылы бір-бірімізге жақындай түсеміз деп ойлаймын, - деді Самат Серікбайұлы.