Санитариялық-эпидемиологиялық бақылау департаментіне биыл тағамнан ұшынды деген күдікпен 46 өтініш келіп түскен. Соған орай 18 жоспардан тыс тексеру жүргізіліп, көпшілік тамақтанатын 3 жердің тазалыққа қатысты талапты бұзғаны анықталды. Өңірлік коммуникациялар қызметінде Департамент басшысының орынбасары Гаухар Қаткенова осылай деді.
Спикердің айтуынша, бұлар өнімнің жарамдылық мерзімі мен сақтау талабын сақтамағаннан, қызметкерлердің жеке медициналық кітапшалары болмай, тамақ пісіріп, таратар кезде құрал-жабдықтарды дұрыс қолданбағаннан болған. Тексеру қорытындысы бойынша заңды тұлғаларға жалпы сомасы 943,7 мың теңге көлемінде айыппұл салыныпты.
Алматыда биыл 3 адамның ботулизммен ауырғаны да тіркелген. Барлық науқас қажетті медициналық көмек алды. Гаухар Қаткенованың айтуынша, тамақтан ұшыну қаупі негізінен мереке күндері, соның ішінде жаңа жыл қарсаңы мен іс-шаралар болып жатқан кезде жиілеп кететін көрінеді.
Тағамнан ұшынудың негізгі белгілері – жүрек айнып, құсу, іштің ауыруы, іш өтіп, бас айналу, әлсіздік. Ауыр жағдайда дене қызуы көтеріледі, ботулизм кезінде көздің көруі нашарлап, жұтыну қиындап, бұлшықетте әл болмайды.
"Алғашқы белгілер пайда болған жағдайда әркім өзін-өзі емдеумен айналысып кетпей, дереу медициналық көмекке жүгінуі керек. Бұл асқынудың алдын алуға мүмкіндік береді", – дейді Гаухар Қаткенова.
Сарапшының айтуынша, Алматыда көбіне майонез қосылған салаттарды, термиялық өңдеуден дұрыс өтпеген ет пен балық тағамын тұтынғанда, сондай-ақ ұзақ тұрып қалған дайын тағамдарды жеген кезде ұшынып қалады.
Департамент мерекелік кезеңде тағам қауіпсіздігін сақтау үшін мынандай ережелерді қаперге алуды ұсынады:
- тез бұзылатын өнімдерді +2…+4 °C температурада сақтау;
- дайын тағамды бөлме температурасында 2 сағаттан артық ұстамау;
- етті, балық пен жұмыртқаны толық термиялық өңдеуден өткізу;
- үйде жасалған консервілерді тұтынудан бас тарту;
- иісі, сыртқы түрі күмәнді немесе мерзімі өткен өнімдерді қолданбау;
- ұшынған жағдайда дәрігерге қаралып, күдікті тағам қалдықтарын мүмкін болса тексеру үшін сақтап қалу керек.