Алматы балалар ойыншығы мен балаларға арналған тауарлардың қауіпсіздігін бақылауда ұстап отыр. Алматы қаласының Өңірлік коммуникациялар қызметі алаңында өткен брифинг барысында Алматы қаласы Санитариялық-эпидемиологиялық бақылау департаменті басшысының орынбасары Гаухар Қаткенова өнімге қойылатын негізгі талап, тексерудің нәтижесі мен кәсіпкерлердің жауапкершілігі туралы баяндады.
Спикердің айтуынша, 2015 жылдан бастап оларды Кеден одағының "Ойыншықтардың қауіпсіздігі туралы" техникалық регламентінің талаптарына сәйкес бақылап, оған бақылау мақсатындағы сатып алулар мен зертханалық зерттеулер де кіретін болған.
"Қауіпсіз ойыншық – ең алдымен дұрыс таңбаланған өнім. Таңбалауда өндіруші туралы ақпарат, шыққан елі, баланың жасы, қолданылған материалдар мен жасалған күні анық көрсетілуі тиіс. Бұл деректердің болмауы заңбұзушылық болып саналады", – дейді Гаухар Қаткенова.
2025 жылы Алматы қаласында қосымша сатып алу жұмысы аясында 108 ойыншық үлгісі сатып алынып, зертханалық тексеруге жіберіліп, бұл өнімдердің 53,7%-ы таңбалау талаптарына сәйкес келмегені анықталған.
Сондай-ақ бақылау іс-шаралары барысында кондитерлік өнімдер де тексерілді. Зертханада зерттеп көру үшін 86 тәтті өнімнің үлгісі сатып алынып, олардың 27,6%-ы қауіпсіздік пен таңбалау жөніндегі техникалық регламенттің талаптарына сәйкес келмейтіні белгілі болды. Жалпы айналымнан талапқа сай келмейтін 1 тоннадай тағам өнімі алынды.
"Талапқа сай келмейтін барлық өнім сатылымнан алынады. Кәсіпкерлерге қатысты әкімшілік шаралар қолданылады. Биыл 40 бизнес нысаны жауапқа тартылып, оларға салған айыппұл 13,9 млн теңгеге жетті", – дейді спикер.
Гаухар Қаткенованың айтуынша, үш жасқа дейінгі балаларға арналған ойыншықтарға қосымша шектеулер қолданылады.
"Табиғи теріні, әйнекті, фарфорды, түкті резеңкені, ылғалды жерде 5%-дан артық ұлғаятын толтырғышты қолдануға болмайды. Ойыншықтардың қыры өткір, ұсақ бөлшектері мен бөгде иісі болмауы тиіс", – деп түсіндірді ол.
Департаментте профилактикалық бақылау тек қана көшпелі тексерулер арқылы емес, сонымен қатар ақпараттық жүйелер деректерін талдау мен санитариялық-эпидемиологиялық бақылауға жататын өнімдердің жарнамасын бақылап отыру арқылы да жүргізілетінін атап өтті.
Заңсыздық анықталған жағдайда кәсіпкерлер оларды жоюға міндетті. Талапты орындамаған жағдайда нысан тексеру жүргізілетін профилактикалық бақылау тізіміне енгізіледі, заң бұзушылық қайталанар болса қызметті тоқтатуды көздейтін материалдарды сотқа жолдайды.
Алматы қаласы Санитариялық-эпидемиологиялық бақылау департаменті ата-аналарға ойыншық сатып аларда мынадай кеңестер береді:
• тауардың таңбалануын мұқият зерделеу;
• өндіруші, шыққан ел мен баланың жасы туралы ақпараттың болуын тексеру;
• материалға, иісіне, бояудың өңіп кетпейтініне зер салу;
• растайтын құжаттары жоқ ойыншықты сатып алмау;
• ақпарат мемлекеттік және орыс тілінде көрсетілген өнімді таңдау.