Алматыда өткен қалалық семинар – мұғалім беделін көтерудің, сапалы білімге бастар жолдың жарқын көрінісі
Бүгінгі білім беру жүйесі – жай ғана оқыту емес, жаңа ғасырдың талабына сай жеке тұлға қалыптастыру алаңы. Бұл – инновациялық тәсілдерді, шығармашылық көзқарасты, кәсіби ынтымақтастықты қажет ететін күрделі де жауапты сала. Мұндай маңызды үдерісте ұстазға артылар жүк ауыр. Ал сол ұстаз еңбегі ескеріліп, тәжірибесі таратылып, кәсіби шеберлігі шыңдалып отырса, білім сапасы сөзсіз өседі.
2025 жылдың 25 сәуірінде Алматы қаласы, Наурызбай ауданындағы №208 мектеп-гимназиясының қабырғасында өткен «Білім беру үрдісіндегі озат тәжірибе: ортақ мақсаттарға жетудің кепілі» атты қалалық семинар – осы сөзіміздің айқын дәлелі.
Бұл семинар – бір күндік жиын ғана емес, бүгінгі білім саласындағы тың идеялардың, заманауи көзқарастардың, әрі ең бастысы, мұғалімнің қоғамдағы орнын айқындайтын маңызды алаң. Алматы қаласы Білім басқармасы, «Қалалық білім берудегі жаңа технологиялардың ғылыми-әдістемелік орталығы» және №208 мектеп-гимназиясының бірлесе ұйымдастырған бұл шара педагогтер қауымы үшін үлкен серпіліс әкелді.
Кәсіби шеберліктің көкжиегі кеңейді!
Семинар барысында ұстаздар «Мамандықтар қалашығына саяхат» арқылы оқушылардың кәсіби бағдарын анықтауға арналған ерекше жобамен танысты. «Зерттеу жұмыстары мен тәжірибе алаңы» алаңында әріптестер ғылыми ізденістерімен бөлісіп, өз тәжірибелерін ортаға салды. Семинардың ресми ашылуынан кейін тыңдалған мазмұнды баяндамалар мен үлгілі сабақтар көпшілікті тәнті етті. Бұл – тәжірибенің сөз жүзінде емес, нақты іспен дәлелденгені.
Жаңа әдістемелер, педагогикалық инновациялар, теория мен практиканы ұштастыру, кросс-пәндік байланыстар – бәрі де қазіргі білім беру жүйесінің негізгі тіректеріне айналып отыр. Мұғалімдердің бұл бағыттағы шеберлігі мен ізденісі семинар барысында айқын көрініс тапты.
Семинар – шабыт пен серпіліс алаңы!
Бүгінгі мұғалім – өз пәнінің маманы ғана емес, ол психолог, бағыт-бағдар беруші, технологияны меңгерген жан-жақты тұлға. Мұндай талаптар заман туғызып отыр. Ал осы талаптарды игеруде педагогке қолдау көрсету – ең басты міндет. Семинар барысында ұстаздар осындай қолдауды сезініп қана қоймай, бір-бірінен үйреніп, ортақ мақсатқа жетудің жаңа жолдарын ашты.
Дуальды оқыту элементтері, ата-ана – оқушы – мұғалім үштігінің ынтымақтастық моделі, функционалдық сауаттылықты арттыру тәсілдері – барлығы осы семинардың күн тәртібінде қамтылды. Әрбір қатысушы жаңа оймен, тың идеямен, кәсіби шабытпен оралды.
Ұстаздар да үйренуге тиіс, үйренуден шаршамауы тиіс!
Қатысушылардың кері байланыс сессиясындағы пікірлері – семинардың сәтті өткенінің басты дәлелі. Мұғалімдердің айтуынша, мұндай мазмұнды әрі практикалық бағыттағы іс-шаралар олардың кәсіби дамуына тың серпін береді. Ұйымдастырушылар мен қатысушылардың кәсіби деңгейі, шығармашылық көзқарасы мен жаңашылдығы – көпке үлгі.
Қазір педагогтерге қойылатын талап күн санап артып келеді. Бірақ сонымен бірге оларға жасалатын қолдау мен ортақ тәжірибе алмасу алаңдары да артуы тиіс. Бұл семинар – дәл сондай мүмкіндіктің бірі.
Білім саласындағы озат тәжірибе – құрғақ ұғым емес. Ол – нақты іс. Ол – күнделікті ізденіс пен тоқтаусыз даму. Ал мұндай семинарлар осы үдеріске тың серпін беріп, мұғалімді жаңаша ойлауға, шабытпен жұмыс істеуге жетелейді.
Семинар – ұстаздар қауымының мерекесі іспетті. Бұл – ой бөлісу, идея алмасу, шабыттану, жігерлену, қайта түлеп, жаңару алаңы. Ұстаз – ұлт болашағын қалыптастырушы болса, осындай басқосулар сол болашақтың берік іргетасын қалайтын игі іс.
Аденова Гүлбағда,
Алматы қаласы, Наурызбай ауданы №208 мектеп-гимназиясының директоры