«Алматы мектептері» жобасы аясында қаламыздағы мектепке дейінгі мекемелер мен мектеп басшылары Жапония еліне барып, әріптестерінің тәжірибесін үйреніп қайтқан еді. Қазір сол тәжіртбені Қазақстанға бейімдеу мүмкіндігін қарастыруды бастап та кетті.
Қалалық білім басқармасының мәліметінше, күншығыс еліне жасаған сапар барысында білім беру саласындағы тәжірибені, әсіресе мектепке дейінгі және мектептегі білім беру әдістерін, инновациялық педагогикалық тәсілдерді және оқу үдерісін ұйымдастыруды зерттеу мақсатында ұйымдастырылған. Топ құрамына Алматы қаласында инновациялық білім беру бағдарламаларын енгізу бойынша жұмыс істейтін мамандар да кірді.
Бостандық аудандық білім бөлімінің басшысы Айгүл Қасымбектің айтуынша, іссапар бағдарламасы білім беру мекемелеріне (балабақша, мектептер) баруды, жапондық педагогтармен, педагогикалық жоғары оқу орындарының оқытушыларымен және білім министрліктерінің өкілдерімен семинарлар мен тренингтерге қатысуды, сондай-ақ әріптестермен тәжірибе алмасуды қамтыған.
«Іс-шараның басты құндылығы – жапон білім беру жүйесінің ең үздік тәжірибелерін зерттеу. Бұл жүйе өзінің тиімділігімен, тәртіпке, ұжымдық жұмысқа және балаларда тұрақты дағдыларды қалыптастыруға баса назар аударуымен танымал. Біз теориялық тәсілдердің практикада қалай жүзеге асырылатынын көріп, оларды жергілікті жағдайларға бейімдеу мүмкіндігін талқыладық», – дейді Айгүл Қасымбек.
Сәтін салса, жапон әдістемелері Алматының білім беру жүйесіне сәтті бейімделуі мүмкін. Бұл, әсіресе, үлкендерді құрметтеу, тәртіптілік және топпен жұмыс істеу дағдыларын дамытуға қатысты, бұл қазақстандық дәстүрлермен үйлеседі. Дегенмен, әдістемелерді бейімдеу үшін Қазақстанның мәдени және әлеуметтік ерекшеліктерін де ескеру қажет.
Қазақстанда бұған дейін Азия елдерінің білім беру модельдерінің жекелеген элементтері, мысалы, топпен жұмыс істеу дағдыларын ерте дамыту және жобалық оқыту енгізілген еді. Алайда бұл тәжірибелер жүйелі түрде енгізілмеді. Сондықтан аталмыш сапар Қазақстанның білім беру жүйесін одан әрі дамыту үшін маңызды болып табылады.
Жалпы, жапон педагогикасы Мағжан Жұмабаевтың педагогикалық көзқарастарымен үндес екені байқалады.
«Мағжан Жұмабаев бала бойында рухани және адамгершілік қасиеттерді ұжымдық іс-әрекет арқылы дамытудың маңыздылығын ерекше атап өткен. Бұл жапондық білім беру жүйесінің де басты аспектілерінің бірі. Бұл елде үлкендерді құрметтеуге, еңбекқорлыққа, ұжымдық жауапкершілікке және топ ішіндегі үйлесімге ерекше көңіл бөлінеді. Бұл Мағжан Жұмабаевтың тәрбиені тек білім беру ғана емес, сонымен қатар мықты мінез-құлық пен қоғам алдындағы жауапкершілік сезімін қалыптастыру деп түсінетін педагогикалық көзқарастарымен ұқсас. Сондай-ақ, жапон әдістемесі тәртіп пен ынтымақтастықты дамытуға бағытталған, бұл қазақ педагогының философиясына сәйкес келеді. Осындай ортақ қағидаттар жапон тәжірибесін Қазақстанның білім беру жүйесіне ұлттық дәстүрлер мен мәдени ерекшеліктерді ескере отырып сәтті бейімдеуге мүмкіндік беретін сыңайлы.