Алматыда бір күнде 200-ден астам есірткі жарнамасы өшірілді, деп хабарлайды Aqshamnews.kz тілшісі Polisia.kz-ке сілтеме жасап.
Алматы қаласында полиция, Әуезов ауданының Комьюнити орталығы және Jas Volunteers еріктілері бірлесіп, есірткі саудасын насихаттайтын интернет-ресурстарға апаратын тыйым салынған жазбаларды жоюға бағытталған арнайы акция өткізді.
Шара барысында бір тәуліктің ішінде 200-ден астам жарнама өшірілген. Акция Профилактика жылы аясында ұйымдастырылды.
Алматы ПД Есірткі қылмысына қарсы іс-қимыл басқармасының бастығы Мұрат Жұмабаев жастарға бағытталған мұндай қауіпке жол бермеу маңызды екенін атап өтті.
«Қаланы есірткі жарнамасынан жүйелі түрде тазартып келеміз. Әр жазба – жастарды қылмыстық схемаға тартып әкетуі мүмкін. Еріктілерге үлкен алғыс айтамыз. Күшіміз – бірлікте», – деді ол.
Полиция қала тұрғындарын көшеде, ғимарат қабырғаларында немесе аулаларда есірткіні насихаттайтын белгілер мен сілтемелерді байқаса, дереу құқық қорғау органдарына хабарлауға шақырады. Бұл тыйым салынған контентті жедел жоюға және оның таралуының алдын алуға мүмкіндік береді.