قازاقتا ۇمىت بولا باستاعان قولونەر تۇرلەرى كوپ. سولاردىڭ ءبىرى – ءداستۇرلى ءبىز كەستە تىگۋ ونەرى. قازاقپەن بىرگە جاساسقان ءتول ونەرىمىزدى باسقا قىرىنان تانىتىپ، زاماناۋي ونەرمەن ۇشتاستىرىپ جۇرگەن سۋرەتشى زەينەلحان مۇحامەدجانمەن اڭگىمەلەسۋدىڭ ءساتى ءتۇستى.
ءداستۇرلى ءبىز كەستە تىگۋ ونەرىنىڭ نەگىزىن قالاۋشى زەينەلحان اعانىڭ ايتۋىنشا، كەيىنگى كەزدەرى ءبىز كەستە جاقسى سۇرانىسقا يە بولىپ كەلەدى. بۇگىندە بۇل سالاعا قىزىعاتىن، وسى ونەرمەن اينالىسقىسى كەلەتىن جاستار دا كوبەيگەن.
– مەنىڭ ءبىز كەستەمەن اينالىسقانىما قىرىق جىلعا جۋىقتاپ قالدى. حالقىمىزدىڭ ءبىز كەستەسى عاسىرلار بويى قازاقپەن بىرگە جاسادى. بايىرعى ونەر وتە كۇردەلى قولونەر تۇرلەرىنىڭ ءبىرى. قازاق حالقىنىڭ تاريحىندا بەيبىت ومىردەن گورى، جاۋگەرشىلىك، ارپالىستا وتكەن كەزەڭ كوپ بولعان. كوشپەلى زاماندا، قازاقتىڭ باسىنان وتكەن سان قيلى قيىندىق سالت داستۇرىنە، مادەنيەتى مەن ونەرىنە دە زيانىن تيگىزدى. كەيبىرى وزگەرىسكە ۇشىرادى، كەيبىرى ۇمىتىلدى. سولاردىڭ ءبىرى – ءبىز كەستە ونەرى. كوشىپ-قونىپ جۇرگەن قازاق قۇندى، اسىل دۇنيەلەرىنىڭ ءبىرازىن جوعالتتى. ودان بەرىرەكتە، كەڭەس ۇكىمەتى تۇسىندا قازاق ەلىندە كۇندەلىكتى قولدانىستان شىعىپ، حالىق بىزبەن كەستە تىگۋدى ۇمىتا باستادى. ونىڭ ورنىن ارزانقول دۇنيەلەرمەن الماستىردى. جاساندى كىلەمشەلەر، ارنايى تەحنيكامەن توقىلعان الاشالار شىعا باستادى. ونەر قۇلدىراپ، شەبەرلەر ازايدى.
توقسانىنشى جىلدارى قولونەرمەن اينالىسا باستاعان شاعىمدا قولىم بوس كەزدە، كەستە تىگەتىنمىن. قولىما ءجيى ءبىز الىپ، كەستە تىگىپ جۇرگەندىكتەن، وسى ونەرگە قىزىعۋشىلىعىم ارتا باستادى. سويتەپ، كەستەمەن جاقسى ءبىر دۇنيە جاساپ كورسەم دەگەن وي كەلدى. العاش رەت كىشكەنتاي دۇنيە تىگىپ، تۋىندىمدى 1986 جىلى موڭعولياداعى جاس سۋرەتشىلەر كورمەسىنە ۇسىندىم. ءبىز كەستەمەن جاساعان العاشقى تۋىندىم بولسا دا، سول كەزدە ونەر زەرتتەۋشىلەرى تاراپىنان قىزىعۋشىلىق بولدى. ەرەكشە تەحنيكامەن ورىندالعان سول جۇمىسىم كوپتىڭ كوزىنە ءتۇستى. جاقسى پىكىرلەر ايتىلدى. سودان باستاپ، ونەر جولىنداعى نەگىزگى، ناقتى باعىتىم ايقىندالدى. وعان دەيىن اينالىسقان قولونەردىڭ باسقا تۇرلەرىن سىرىپ قويىپ، وتە سيرەك كەزدەسەتىن ءبىز كەستە تىگۋ ونەرىمەن اينالىسا باستادىم. سودان بەرى، مىنە، 40 جىلعا تاياپ قالىپتى. وسى ۋاقىت ارالىعىندا قانشاما دۇنيەلەر جاسالدى.
قازاقتىڭ ساندىك-قولدانبالى ونەرى اسقان شىدامدىلىقتى، ەپتىلىك پەن شەبەرلىكتى تالاپ ەتەتىن كۇردەلى جۇمىس، – دەيدى زەينەلحان مۇحامەدجان.
قازاقستان سۋرەتشىلەر وداعىنىڭ مۇشەسى، كوركەم ءبىز كەستەنىڭ نەگىزىن قالاۋشى زەينەلحان اعادان العان سۇحباتتىڭ تولىق نۇسقاسىن Almaty aqshamy گازەتىنىڭ الداعى نومىرلەرىنەن وقي الاسىزدار...
جازىپ العان – گۇلجانات سەمبايەۆا.