قازاقستاننىڭ رەپرودۋكتيۆتى مەديسينا قاۋىمداستىعىنىڭ پرەزيدەنتى، پروفەسسور ۆياچەسلاۆ لوكشين بالالاردى ەرىكتى ۆاكسينالاۋدىڭ قاجەت شارا ەكەنىن ايتادى، دەپ حابارلايدى almaty-akshamy.kz قازاقپاراتقا سىلتەمە جاساپ.
«COVID-19 ىندەتى اۋەلدە، اسىرەسە، ەگدە جاستاعى ادامداردا اۋىر وتسە، كەيىنگى كەزدە بالالاردىڭ اعزاسىنا دا كەرى اسەرىن تيگىزۋدە. بالالار اراسىندا COVID-19 ىندەتى ءارقالاي ءوتىپ جاتىر. اۋىر جاعدايلارى دا بار، «كاۆاساكي سيندرومى» دا كەزدەسىپ وتىر، قان تامىرلاردىڭ قىزمەتى بۇزىلۋدا. سوندىقتان وتە تەز بەيىمدەلگىش ىندەتتىڭ الدىن الاتىن جالعىز جول ۆاكسينالاۋ بولىپ تۇر. بۇدان الەمدى ۆاكسينا عانا قۇتقارا الادى»، - دەگەن مامان بۇگىندە كوپتەگەن ەلدە بالالار مەن 15-تەن اسقان جاسوسپىرىمدەردى ۆاكسينالاي باستاعانىن ەسكە سالدى.
«قىتايدا ءتىپتى 3-تەن اسقان بالالاردىڭ ءبارىن ۆاكسينالاپ جاتىر. اقش پەن يزرايل 12 جاستان باستاپ ۆاكسينالاۋعا كوشتى. بۇل تۇرعىدا ەشقانداي ءبىر ەرەكشە تاۋەكەل جوق ەكەنىن ايتۋ كەرەك. ويتكەنى قولدانىلىپ جاتقان ۆاكسينا ادام اعزاسىندا سىناقتان وتكەن. ونىڭ ىشىندە جۇكتى ايەلدەرگە دە سالىندى. جەر شارىندا ونداعان مىڭ بالا ۆاكسينا قابىلداپ ۇلگەردى. كەيبىر ەلدەردە وسى جاستاعى بالالاردىڭ جارتىسى ەكپە الدى. ارينە، ۆاكسيناسيا اتا-انالاردىڭ رۇقساتىمەن جۇرگىزىلۋى كەرەك. ۆاكسينا اۋرۋعا شالدىقپاۋدىڭ نەمەسە اۋرۋدى وڭاي وتكەرۋدىڭ جالعىز جولى ەكەنىن ءتۇسىنۋ كەرەك. سوندىقتان بالالار مەن جاسوسپىرىمدەردى ەرىكتى ۆاكسينالاۋ وتە قاجەت»، - دەدى ۆياچەسلاۆ لوكشين.