وسكەمەندەگى Altay Pro كلۋبىندا جاقىندا ەرەكشە ءسات بولدى. 5 جاسار بالا الەم چەمپيونىمەن تەڭ دارەجەدە دوپ الماسىپ، بارشانى تاڭعالدىراتىنىن كىم ويلاعان؟ بۇل - ۇستەل تەننيسىنەن كىشكەنتاي مايتالمان اتانعان ماكسيمنىڭ وقيعاسى.
ۆيدەو الەۋمەتتىك جەلىدە تاراپ كەتتى. وندا كىشكەنتاي دارىننىڭ الەم چەمپيونى ۆەرنەر شلاگەرگە دەس بەرمەگەنىن بايقاۋعا بولادى. اqshamnews.kz ءتىلشىسى بالانىڭ اناسى يۋليامەن سۇحباتتاستى.
الەم چەمپيونى ۆەرنەر شلاگەر (سول جاق شەتتە) مەن ەۋروپا چەمپيونى ۆلاديمير سامسونوۆپەن (وڭ جاق شەتتە) تۇسكەن سۋرەت
تۋعانىنان تەننيس زالىندا وسكەن بالا
ماكسيم - تەننيس زالىندا "تۋعان" بالا. سەبەبى ونىڭ اتا-اناسى – كاسىبي سپورتشىلار، ۇستەل تەننيسىنىڭ ناعىز مايتالماندارى. اكەسى - رەسەيدىڭ، اناسى - قازاقستاننىڭ سپورت شەبەرى. كىشكەنتاي ماكسيم اتا-اناسىمەن بىرگە ۇنەمى جاتتىعۋ زالىندا جۇرەدى.
“ونى ءبىر جاسىندا ۇستەلگە وتىرعىزىپ، كىشكەنتاي راكەتكا بەرەتىنبىز. سول كەزدە-اق دوپتى قايتارۋعا تىرىساتىن"، - دەيدى اناسى.
بۇگىندە يۋليا دا، ونىڭ جولداسى دا Altay Pro كلۋبىنىڭ جاتتىقتىرۋشىلارى. اناسى بۇرىن قازاقستان قۇراماسىندا ويناپ، 2017 جىلى سپورتتىق مانسابىن اياقتاپ، باپكەرلىككە اۋىسقان.
بالانىڭ اتا-اناسى ونى سپورت جولىنا سالعىسى كەلمەگەن
ەكى كاسىبي سپورتشى ءۇشىن بالانىڭ دا سول جولمەن ءجۇرۋى – ءبىر جاعىنان ماقتانىش، ەكىنشى جاعىنان جاۋاپكەرشىلىك.
“شىنىن ايتساق، ماكسيمدى مىندەتتى تۇردە تەننيسكە بەرەمىز دەپ ويلامادىق. باپكەر ەمەس، اتا-انا بولعىمىز كەلدى. ءبىراق ونىڭ دارىنىن كورگەن سوڭ، جولىنا كەدەرگى بولۋعا بولمايتىنىن تۇسىندىك.”
ماكسيمنىڭ تەحنيكاسى جاسىنا قاراماستان ەرەكشە: ول جىلدام رەاكسياسىمەن، دالدىگىمەن جانە ويىن كەزىندەگى ۇستامدىلىعىمەن ەرەكشەلەنەدى.
ماكسيم تەننيسپەن عانا شەكتەلمەيدى
ماكسيم مەكتەپكە ءالى بارا قويعان جوق. ءقازىر ول كۇن سايىن جاتتىعادى، وعان قوسا، اعىلشىن ءتىلىن ۇيرەنۋدى باستادى.
ۇستەل تەننيسىنەن بولەك، بادمينتوندى دا جاقسى كورەدى. اتا-اناسىنىڭ جۇمىس زالىندا بادمينتون الاڭى دا بار. ال فۋتبولدا قاقپاشى بولۋعا قۇمار.
“ەسەيگەندە بولعاندا كىم بولاسىڭ؟” دەگەن سۇراققا ونىڭ جاۋابى دايىن. “چەمپيون!”
بالانىڭ ارمانى – قازاقستان پرەزيدەنتىمەن ويناۋ
ماكسيمنىڭ ءبىر ەرەكشە ارمانى – قازاقستان پرەزيدەنتى قاسىم-جومارت توقايەۆپەن ۇستەل تەننيسىن ويناۋ.
بۇل ارماننىڭ تاريحى دا بار. ماكسيمنىڭ اناسى يۋليا 2017 جىلى قازاقستان رەسپۋبليكاسىنىڭ چەمپيوناتىندا ونەر كورسەتكەندە، وعان ماراپاتتى سول كەزدە ۇستەل تەننيسى فەدەراسياسىن باسقارعان قاسىم-جومارت توقايەۆ تابىستاعان.
ال ەندى، اراعا جىلدار سالىپ، ونىڭ ۇلى مەملەكەت باسشىسىمەن ويناۋدى ارمان ەتكەن. بۇل - كەز كەلگەن سپورتشى بالا ءۇشىن ۇلكەن موتيۆاسيا، ال وتباسى ءۇشىن ەرەكشە ءسات بولار ەدى.