“ۇلىتاۋدى” ەلەمەۋ – ۇلتتىق ونەردى، ادال ەڭبەكتى ەلەمەۋ!

ءانشى قاراقات ءابىلدينا “ۇلىتاۋ” توبىنىڭ اتاقسىز قالعانىنا قاتىستى رەنىشتى جازبا جاريالادى، دەپ حابارلايدى aqshamnews.kz

“ءقازىر الەۋمەتتىك جەلىدە قوزعاپ جاتقان ماسەلە تۋرالى مەنىڭ دە ايتارىم بار! 25 جىل بويى دومبىرانى ارقالاپ، 25 جىل بويى قازاقتىڭ ءۇنىن الەمگە تانىتىپ، 25 جىل بويى مادەنيەت ءۇشىن تىنىمسىز ەڭبەك ەتكەن “ۇلىتاۋ” توبى تاعى دا ەلەۋسىز قالدى. ولار ماراپات سۇراپ وتىرعان جوق. ءبىراق ەڭبەكتىڭ ەسكەرىلمەۋى – ادىلەتسىزدىك. ولار – قازاقتىڭ برەندىنە اينالعان بىرەگەي توپ. موسارت پەن قۇرمانعازىنى ءبىر ساحنادا ۇندەستىرە العان قۇبىلىس! ولار – ەتنو-روكتى يدەولوگيا ءۇشىن ساحناعا الىپ شىققان تالانت يەلەرى. “ۇلىتاۋ” بولماسا، بۇگىنگى جاستار كۇيگە ءدال وسىلاي عاشىق بولار ما ەدى؟! دومبىرا ءدال وسىنداي جاڭا تىنىس الار ما ەدى؟! ستاديون تولى حالىق جينالار ما ەدى؟!”، – دەپ جازدى قاراقات ءوزىنىڭ ينستاگرامداعى پاراقشاسىنا.

سونداي-اق ءانشى بۇل جازباسىنىڭ جەكە پىكىر ەكەنىن ەسكە سالدى. 

“سوندا قالاي؟! ماراپات كىمگە بەرىلەدى؟! حالىقتىڭ جۇرەگىنەن ورىن العان توپقا وسى ۋاقىتقا دەيىن رەسمي تۇردە ءبىر جاپىراق قاعاز دا بۇيىرماۋى ادىلەت پە، اعايىن؟! “ۇلىتاۋ” توبىنىڭ پروديۋسەرى ءقىدىرالىنىڭ جارى بولعانىم ءۇشىن عانا ەمەس، مادەنيەتتىڭ جاناشىرى، ۇلتتىق رۋحتىڭ ءۇنىن كوتەرىپ جۇرگەن ءانشى، انا، ازامات رەتىندە ايتارىم مىناۋ: “ۇلىتاۋدى” ماراپاتتاۋ – كۇيگە، دومبىراعا، ۇلتتىق رۋحقا باس يۋ. “ۇلىتاۋدى” ەلەمەۋ – ۇلتتىق ونەردى، ادال ەڭبەكتى ەلەمەۋ! ءسىز قالاي ويلايسىز؟” – دەدى ءانشى.