ۇكىمەت جايلى مەكتەپتەردى ارنايى باسقارۋ جۇيەسىن ەنگىزۋدى ويلاستىرۋى كەرەك. بۇل تۋرالى قازاقستان حالقىنا جولداۋىن جاريالاۋ كەزىندە مەملەكەت باسشىسى قاسىم-جومارت توقايەۆ ايتتى.
«ءبىز ءتۇرلى سالاداعى ماماندارعا، قاتارداعى جۇمىسشىلارعا قۇرمەت كورسەتۋىمىز قاجەت. باسەكەگە قابىلەتتى ەكونوميكاسى بار وزىق ەل بولامىز دەسەك، ەڭ الدىمەن، ادال ەڭبەكتى باعالاعان ابزال. سوندىقتان ينجەنەرلەرگە، گەولوگتارعا، كەن ورنىن يگەرۋشى ماماندارعا، اۋىل شارۋاشىلىعى، كولىك جانە سۋ سالاسىنىڭ قىزمەتكەرلەرىنە، عالىمدار مەن ونەرتاپقىشتارعا بەرىلەتىن قۇرمەتتى اتاقتار مەملەكەتتىك ماراپاتتار ساناتىنا قوسىلادى. ەڭبەگىنىڭ مەملەكەتتىك دەڭگەيدە باعالانۋى بارشا كاسىپ يەسىنە ەرەكشە شابىت بەرەدى، ەڭبەك ادامنىڭ ابىروي-بەدەلىن كوتەرەدى. ەلىمىزدىڭ كادرلىق الەۋەتىن ارتتىرۋ ىسىندە ورتا ءبىلىم بەرۋ جۇيەسى وتە ماڭىزدى ءرول اتقارادى. مەنىڭ تاپسىرماممەن «جايلى مەكتەپ» ۇلتتىق جوباسى جۇزەگە اسىرىلىپ جاتىر. 2025 جىلدىڭ سوڭىنا دەيىن زاماناۋي ۇلگىدەگى 217 مەكتەپ پايدالانۋعا بەرىلەدى دەپ جوسپارلانعان. وسى وتە ماڭىزدى جۇمىستى «سامۇرىق-قازىنا» قورى قاداعالاپ وتىر. ۇكىمەت پەن اكىمدەر بۇل شارۋاعا بەلسەنە اتسالىسۋعا ءتيىس. دەپۋتاتتار دا ورتاق ىستەن شەت قالمايدى دەپ ويلايمىن»، - دەدى قاسىم-جومارت توقايەۆ.
پرەزيدەنتتىڭ پايىمىنشا، ۇكىمەت جايلى مەكتەپتەردى ارنايى باسقارۋ جۇيەسىن ەنگىزۋدى ويلاستىرۋى كەرەك. سونىمەن بىرگە، ەلىمىزدەگى 1300 مەكتەپكە كۇردەلى جوندەۋ جۇرگىزۋ قاجەت. ۇكىمەت اكىمدەرمەن بىرگە ونى قارجىلاندىرۋ كوزدەرىن انىقتاپ، سونىڭ ىشىندە دەمەۋشىلەردەن دە قاراجات تارتىپ، 3 جىل ىشىندە بۇل مەكتەپتەردى تولىق جاڭارتۋى كەرەك.
«مەملەكەت كەپىلدى تولەمدەر ءۇشىن قىرۋار قاراجات بولەدى. ونىڭ ىشىندە جەكەمەنشىك مەكتەپتەرگە بەرىلەتىن قارجى دا بار. مىسالى، 250 مىڭنان استام بالا وقيتىن جەكەمەنشىك مەكتەپتەرگە بيىلدىڭ وزىندە بيۋدجەتتەن 134 ميلليارد تەڭگە ءبولىندى. اتا-انالار مەملەكەتتىڭ جەكە مەنشىك مەكتەپتەرگە ناقتى كومەك بەرىپ جاتقانىن بىلۋگە ءتيىس. وسىعان وراي ءار بالاعا نورماتيۆ بويىنشا بولىنگەن قاراجات كورسەتىلىپ تۇرۋى قاجەت. سوندا ازاماتتارىمىز الەۋمەتتىك باعدارلامالارعا ءبولىنىپ جاتقان قارجى تۋرالى شىنايى اقپاراتتان حاباردار بولادى»، - دەدى مەملەكەت باسشىسى.