«تۋريزم ەكونوميكانىڭ وسۋىنە جاڭاشا سەرپىن بەرەتىن سالا بولۋعا ءتيىس. ەلىمىزدىڭ ءار وڭىرىندە كورىكتى جەرلەر بار. سوندىقتان جەكە ينۆەستورلاردى دا تارتا وتىرىپ، قاجەتتى ينفراقۇرىلىم سالۋ جۇمىسىن دەرەۋ باستاۋ قاجەت».
قاسىم-جومارت توقايەۆ قازاقستان رەسپۋبليكاسىنىڭ پرەزيدەنتى
قازاقستانداعى تۋريزم سالاسىندا اتقارىلىپ جاتقان جۇيەلى شارالار ەلدەگى تۋريستىك اعىندى ارتتىرۋعا ىقپال ەتىپ، الەمدىك رەيتينگتەگى ورنىمىزدى ايتارلىقتاي جاقسارتۋدا. مىسالى، دۇنيەجۇزىلىك ەكونوميكالىق فورۋمنىڭ ساياحات پەن ءتۋريزمدى دامىتۋ يندەكسىندە قازاقستان 119 ەلدىڭ اراسىندا 52-ورىندى يەلەنىپ، 66-ورىننان كوتەرىلدى.
2023 جىلى قازاقستانعا تۋريستىك ماقساتپەن 15،3 ميلليون شەتەلدىك قوناق كەلگەن. ونىڭ 10،4 ميلليونى ەلىمىزدە ءبىر كۇننەن كوپ ۋاقىتتى وتكىزىپ، شەتەلدىك تۋريستەر قاتارىنا قوسىلدى. ورتاشا العاندا، شەتەلدىك مەيمانداردىڭ ەلىمىزدە بولۋ ۋاقىتى – 4 كۇن.
ۇلتتىق بانك مالىمەتىنشە، الىس شەتەلدەن كەلگەن تۋريستەر قازاقستاندا ساپار بارىسىندا ورتا ەسەپپەن 1500 اقش دوللارىن جۇمسايدى. 2024 جىلى شەتەلدىك تۋريستەر ەلىمىزدە 1،2 ترلن تەڭگەدەن استام قاراجات جۇمسادى.
تۋريزم سالاسىنداعى ينۆەستيسيالار جىل سايىن ءوسىپ كەلەدى. 2019-2024 جىلدار ارالىعىندا سالاعا سالىنعان نەگىزگى كاپيتال كولەمى مىناداي بولدى:
- 2019 ج. – 502 ملرد تگ
- 2020 ج. – 629 ملرد تگ
- 2021 ج. – 593 ملرد تگ
- 2022 ج. – 513 ملرد تگ
- 2023 ج. – 787 ملرد تگ
- 2024 ج. – 947،5 ملرد تگ
2019-2024 جىلدارى تۋريزم سالاسىندا جالپى سوماسى 550 ملرد تەڭگەگە 605-دەن استام ينۆەستيسيالىق جوبا ىسكە اسىرىلدى. 2024 جىلى 87 ينۆەستيسيالىق جوبا تابىستى اياقتالدى.
ءىرى جوبالار اراسىندا شىمكەنت قالاسىنداعى «ماحامبەت» قوناق ءۇيى (4،9 ملرد تەڭگە)، اتىراۋ وبلىسىنداعى «Keremet Park» وتباسىلىق پاركى (3 ملرد تەڭگە)، الماتى وبلىسىنداعى «اق-جايىق» دەمالىس ايماعى (1،8 ملرد تەڭگە) ەرەكشە اتالىپ وتۋگە تۇرارلىق.
قازاقستاننىڭ تۋريزم سالاسىنا ينۆەستيسيالار تارتۋ، ينفراقۇرىلىمدى دامىتۋ جانە كورىكتى جەرلەردى ۇتىمدى پايدالانۋ ارقىلى بۇل سالا ەكونوميكامىزدىڭ ماڭىزدى بولىگىنە اينالادى.