قاسىم-جومارت توقايەۆ «بەيبىتشىلىك پەن قۇقىققا نەگىزدەلگەن بولاشاق» اتتى كونستيتۋسيالىق سوت تورەلىگىنىڭ حالىقارالىق فورۋمىنا قاتىسۋشىلارمەن كەزدەستى، - دەپ حابارلايدى اqshamnews.kz ءتىلشىسى.
باسقوسۋعا ۆەنەسيا كوميسسياسىنىڭ پرەزيدەنتى كلەر بازي مالوري، ءباا جوعارعى فەدەرالدىق سوتىنىڭ ءتوراعاسى مۇحاممەد حاماد مۇحاممەد ءال بادي ءال زاحري، افريكا كونستيتۋسيالىق يۋريسديكسيا ورگاندارى كونفەرەنسياسىنىڭ ءتوراعاسى ليۋك مالابا، موڭعوليا كونستيتۋسيالىق سوتىنىڭ ءتوراعاسى باياسگالان گۋنگاا قاتىستى.
مەملەكەت باسشىسى ەلىمىزگە ساپارمەن كەلگەنى ءۇشىن مەيماندارعا ريزاشىلىعىن ءبىلدىردى.
– ءبىز باسقا مەملەكەتتەردىڭ وزىق كونستيتۋسيالىق ساياساتىمەن بىرگە ۆەنەسيا كوميسسياسىنىڭ شەشۋشى ءرولىن جانە ونىڭ ۇلگىلى زاڭ تاجىريبەسىن باعالايمىز. بۇل – دەموكراتيا ينستيتۋتتارىنىڭ دامۋىن ايقىنداۋ جانە ادام قۇقىعىنا كەپىلدىك بەرۋ ىسىندەگى باستى باعدارىمىز. بيىل كونستيتۋسيامىزدىڭ قابىلدانعانىنا 30 جىل تولدى. وسى ورايدا، اتالعان قۇجاتتىڭ جاھاندىق سىن-قاتەرلەر كەزىندەگى الەۋمەتتىك ۇيلەسىمدى، تۇراقتىلىق پەن قارقىندى دامۋدى قامتاماسىز ەتەتىن نەگىزگى قىزمەتىن اتاپ وتكىم كەلەدى، – دەدى پرەزيدەنت.
قاسىم-جومارت توقايەۆ ەلىمىزدە قولعا الىنعان اۋقىمدى ساياسي، ەكونوميكالىق جانە كونستيتۋسيالىق رەفورمالار جايىندا ايتتى. پرەزيدەنت اتا زاڭعا ەنگىزىلگەن وزگەرىستەر وكىلدى بيلىك تارماعى مەن قۇقىق قورعاۋ ينستيتۋتتارىنىڭ ءرولىن نىعايتىپ، اتقارۋشى بيلىكتىڭ ەسەپ بەرۋ مىندەتىن كۇشەيتكەنىن جەتكىزدى. قايتا جاڭعىرعان كونستيتۋسيالىق سوت ءادىل سوت تورەلىگىنە كەڭىنەن جول اشتى.
مەملەكەت باسشىسىنىڭ ايتۋىنشا، قازاقستاندا «زاڭ جانە ءتارتىپ» قاعيداتى ىسكە اسىرىلىپ جاتىر. قۇقىقبۇزۋشىلىققا قاتىستى جازا مەن جاۋاپكەرشىلىكتى قاتاڭداتۋمەن قاتار حالىقتىڭ قۇقىقتىق مادەنيەتى بىرتىندەپ ارتىپ كەلەدى.