پوليسيا ۆەدومستۆوسىندا تەرروريزم اكتىسى تۋرالى جالعان حابارلاما ءۇشىن جاۋاپكەرشىلىك قاراستىرىلاتىنىن ەسكە سالدى، دەپ حابارلايدى Almaty-akshamy.kz.
«25 قاڭتاردان باستاپ Telegram مەسسەندجەرىندە مەكتەپتەرگە شابۋىل جاساۋ ءقاۋپى تۋرالى ءانونيمدى حابارلامالار تارالا باستادى. حابارلامالار قازاقستاننىڭ التى قالاسىندا، ياعني اقتوبەدە، اتىراۋدا، الماتىدا، پاۆلوداردا، قاراعاندىدا جانە قوستانايدا كەلىپ تۇسكەن. تەرروريزم اكتىسى تۋرالى كورىنەۋ جالعان حابارلاۋ فاكتىلەرى بويىنشا سوتقا دەيىنگى تەرگەۋ باستالدى. بارلىق قاجەتتى تەرگەۋ ارەكەتتەرى جۇرگىزىلۋدە. قازىرگى ۋاقىتتا الماتى، اقتوبە، اتىراۋ جانە پاۆلودار قالالارىندا تارالعان حابارلامالارعا تمد ەلدەرى ازاماتتارىنىڭ قاتىسى بار ەكەنى انىقتالدى. شەتەلدىك ارىپتەستەرمەن ولاردىڭ قىلمىستىق ارەكەتتەرىن اشكەرەلەۋ بويىنشا ءتيىستى ءىس-شارالار جۇرگىزىلىپ جاتىر. الايدا تەرگەۋ مۇددەسىنە بايلانىستى ءبىز ازىرگە بۇل فاكتىلەر بويىنشا تولىق تۇسىنىكتەمە بەرە المايمىز. سونداي-اق قاراعاندى جانە قوستاناي قالالارىندا شابۋىل جاساۋ ءقاۋپى بار حابارلامالاردان كەيىن كامەلەتكە تولماعانداردىڭ Telegram-ارنالارىن اشقانى انىقتالدى. ولار بۇرىن تاراتىلعان حابارلامالاردىڭ ءماتىنىن كوشىرىپ، وقۋ ورىندارىنىڭ فوتوسۋرەتتەرىن ورنالاستىرىپ، ءوز مەكتەپتەرىنىڭ چاتتارىنا جالعان اقپارات جولداعان. قازىرگى ۋاقىتتا قاراعاندى قالاسى №15 ورتا مەكتەبىنىڭ جەتىنشى سىنىپ وقۋشىسى جانە قوستانايداعى №3 مەكتەپ-گيمنازياسىنىڭ ءتورتىنشى سىنىپ وقۋشىسى انىقتالدى. ولاردىڭ قىلمىستىق جاۋاپكەرشىلىك جاسىنا جەتپەگەنى ەسكەرىلىپ، اتا-انالارى بالا تاربيەسىنە كوڭىل بولمەگەندەرى ءۇشىن اكىمشىلىك جاۋاپقا تارتىلدى. سونداي-اق سوت شەشىمى بويىنشا ولار جەدەل قىزمەتتەردى جالعان شاقىرتۋعا جانە ءبىلىم بەرۋ وبەكتىلەرىن تەكسەرۋگە بايلانىستى مەملەكەتكە كەلتىرىلگەن زالالدى وتەيتىن بولادى. شىعىن كولەمى ەكى ميلليون تەڭگەگە دەيىن جەتۋى مۇمكىن»، – دەدى ءىىم يميدجدىك جۇمىس جانە ىشكى كوممۋنيكاسيالار دەپارتامەنتىنىڭ باستىعى البينا ماحامبەتوۆا.
تەرروريزم اكتىسىنە دايىندىق تۋرالى كورىنەۋ جالعان حابارلاما ءۇشىن 5 مىڭ اەك مولشەرىندە، ياعني 18 ملن تەڭگەدەن استام ايىپپۇل نە بولماسا 5 جىلعا باس بوستاندىعىنان ايىرۋ نەمەسە شەكتەۋ جازاسى قاراستىرىلادى. دۇربەلەڭگە جول بەرمەۋ ءۇشىن پوليسيا حالىق اراسىندا ءتۇسىندىرۋ جۇمىستارىن جۇرگىزەدى. بۇل رەتتە وقۋشىلارعا ەرەكشە كوڭىل بولىنەدى.
«حابارلامالار جالعان بولعانىنا قاراماستان، وندا كورسەتىلگەن ورىنداردا قاۋىپسىزدىكتى قامتاماسىز ەتۋ جانە كۇزەتتى كۇشەيتۋ بويىنشا شارالار قابىلدانادى. سونىمەن بىرگە ارانداتۋشىلىق جاريالانىمداردى ورنالاستىراتىن ءانونيمدى ارنالار بويىنشا مەسسەندجەرلەردىڭ اكىمشىلىگىمەن جۇمىستار جۇرگىزىلەدى. اتاپ ايتقاندا، جالعان اقپارات تاراتقان ءانونيمدى ارنا قازىرگى ۋاقىتتا بۇعاتتالدى. بۇل جۇمىس جالعاساتىن بولادى. وتكەن جىلى پوليسيا تەرروريزم اكتىسى تۋرالى كورىنەۋ جالعان حابارلاما بويىنشا 215 قىلمىستىق ءىس قوزعادى. 43 ادام انىقتالدى، ونىڭ 19-ى كامەلەتكە تولماعان، 7 ادام سوتتالدى، ونىڭ ىشىندە 2ء-ۋى كامەلەتكە تولماعان. ءاربىر وسىنداي فاكت بويىنشا جان-جاقتى تەرگەۋ جۇرگىزىلەدى. ال قىلمىسكەرلەردى انىقتاۋ ۋاقىت ەنشىسىندە»، – دەدى البينا ماحامبەتوۆا.