2025 جىلى «تازا قازاقستان» چات-بوتىنا ازاماتتاردان 26 مىڭنان استام ءوتىنىش كەلىپ تۇسكەن.
بەيجايلىق تانىتپاعان تابيعات جاناشىرلارىنىڭ ارقاسىندا ميلليون گەكتار اۋماقتاعى زاڭسىز قوقىس ورىندارى تازارتىلدى. ال شىعىس قازاقستان وڭىرىندە 16 مىڭنان استام ەكولوگيالىق زاڭبۇزۋشىلىق تىركەلدى. نەگىزىنەن ولار سپۋتنيكتىك مونيتورينگ جانە بەينەباقىلاۋ كامەرالارى ارقىلى انىقتالعان. ەلىمىزدىڭ شىعىسىندا «تازا قازاقستان» ەكولوگيالىق اكسياسى اۋقىمدى كولەمدە وتكىزىلدى.
ءار جوباعا شامامەن 5 مىڭعا جۋىق ادام قاتىستى. نەگىزىنەن ولار ستۋدەنتتەر جانە الەۋمەتتىك سالا ماماندارى. الايدا قوعامدىق بەلسەندى رومان چەستنىحتىڭ ايتۋىنشا اكسيانىڭ بۇقارالىق سيپات الۋى، ونىڭ تيىمدىلىگىن كورسەتپەيدى. روماننىڭ پىكىرىنشە ەكولوگيالىق مادەنيەتتىڭ ماڭىزدىلىعىن كرەاتيۆتى شەشىمدەر قولدانا وتىرىپ، قاراپايىم تىلمەن كوپشىلىككە تۇسىندىرە ءبىلۋ قاجەت.
رومان چەستنىح، قوعام بەلسەندىسى: - چاتتار بولسىن، اكىمدىكپەن كەرى بايلانىس قۇرالدارى بولسىن ونىڭ ءبارى ءوز دەڭگەيىندە جۇمىس ىستەمەيدى.
سوڭعى ءتورت جىلدا شىعىسقازاقستاندىقتار 42 ميلليون كوشەت ەككەن. ءبىراق وكىنىشكە وراي، ءبىر جاعىنان تابيعاتقا نۇقسان كەلتىرىپ جاتادى. 2025 جىلى وڭىردە 289 زاڭسىز قوقىس ورىندارى انىقتالعان. ول ۇيىندىلەردىڭ دەنى پوليسيا تەكسەرىسى بارىسىندا ءمالىم بولدى. عارىشتىق مونيتورينگ بارىسىندا دا بىرنەشە زاڭسىز قوقىس الاڭدارى تابىلدى. سولاردىڭ ناقتى ورىنىن كورسەتىپ، «تازا قازاقستان» چات-بوتىنا جولدادىق. بۇل ءتيىستى مەملەكەتتىك ورگاندارمەن تىكەلەي بايلانىس جولى. 2025 جىلى وڭىردەگى 270 زاڭسىز قوقىس الاڭدارى تازارتىلعان. 10 مىڭنان استام ادامعا ايىپپۇل سالىنعان. سولاردىڭ زاڭسىز ارەكەتتەرىن كەيبىرەۋلەر كورىپ، ءبىلىپ جۇرسە دە، ايتىپ، حابارلامايدى. باسىم بولىگى تابيعات تازالىعىن ساقتاۋ ءۇشىن اشىلعان چات بار ەكەندىگىن دە بىلمەيدى. قالا تۇرعىندارى اراسىندا جۇرگىزىلگەن شاعىن ساۋالناما سونى كورسەتتى. وبلىستا چات-بوتتىڭ جەدەل بايلانىس جەلىسى 2024 جىلى اشىلدى. سودان بەرى 200-دەن استام ءوتىنىش قابىلداپتى. كوپ دەۋگە كەلمەيدى. تۇرعىن ءۇي كوممۋنالدىق شارۋاشىلىعى ءبولىمىنىڭ باسشىسى ءوتىنىش تۇسسە، شۇعىل شارالار قولدانۋعا ءازىرمىز، - دەيدى.
ەرجان ىبىرايەۆ، تكش، جولاۋشىلار كولىگى جانە اۆتوموبيل جولدارى ءبولىمىنىڭ باسشىسى: - زاڭسىز قوقىس الاڭدارى تۋرالى اقپارات ادەتتە بىزگە «تازا قازاقستان» پلاتفورماسى ارقىلى تۇسەدى. ونى ماماندار زەتتەپ، سوسىن تازارتۋ جۇمىستارىنا كىرىسەدى. «تازا قازاقستان» چاتى نەگىزگى اقپارات كوزى بولعاندىقتان، كەز-كەلگەن تۇرعىن ول جەردە حابارلاما قالدىرا الادى.
«تازا قازاقستان» رەسپۋبليكالىق ەكولوگيالىق اكسياسى ەلىمىزدە 10 ملن-نان استام بەلسەندىنى بىرىكتىردى. اتقارىلعان جۇمىس - اۋقىمدى. الايدا چات-بوت سياقتى جوبالاردى ايماقتاردا ناسيحاتتاۋ جۇمىسى ماردىمسىز. ءىس جۇزىندە تۇرعىندار «تازا قازاقستان» چات-بوتى جايىندا بىلە بەرمەيدى. سوندىقتان قورشاعان ورتانىڭ لاستانۋ دەرەكتەرىن كورە تۇرا، ءتيىستى ورگاندارعا شاعىمدانبايدى.