ورتالىق مەملەكەتتىك ارحيۆىندە كەڭەس وداعىنىڭ باتىرى، قازاقستاننىڭ حالىق قاھارمانى، جازۋشى باۋىرجان مومىشۇلىنا ارنالعان رەسپۋبليكالىق عىلىمي-پراكتيكالىق كونفەرەنسيا ءوتتى.
جيىنعا «حالىق باتىرى – باۋىرجان مومىش ۇلىنىڭ تاريحي تۇلعاسى مەن رۋحاني مۇراسى ارقىلى جاستاردى پاتريوتيزمگە تاربيەلەۋدىڭ وزەكتى ماسەلەلەرى» تاقىرىبى قويىلدى.
ق ر ورتالىق مەملەكەتتىك ءارحيۆىنىڭ ديرەكتورى ءسابيت شىلدەباي ءىس-شارا قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ 2025 جىلدىڭ 25 جەلتوقسانىنداعى جارلىعىمەن باۋىرجان مومىشۇلىنا «حالىق قاھارمانى» اتاعىن بەرىلۋىنە وراي ۇيىمداستىرىلعانىن اتاپ ءوتتى. ونىڭ ايتۋىنشا، كونفەرەنسيا ماقساتى – باۋىرجان مومىش ۇلىنىڭ تاريحي تۇلعاسى مەن رۋحاني مۇراسى ارقىلى جاستاردى پاتريوتيزم مەن وتانشىلدىققا تاربيەلەۋدىڭ وزەكتى ماسەلەلەرىن تالقىلاۋ.
ال ق ر پرەزيدەنتىنىڭ كەڭەسشىسى مالىك وتاربايەۆ باۋىرجان مومىشۇلىنا «حالىق قاھارمانى» اتاعىنىڭ بەرىلۋى — تاريحي ادىلدىكتىڭ سالتانات قۇرۋى ەكەنىن ايتتى.
- باۋىرجان مومىش ۇلى تەك ۇلى وتان سوعىسىنىڭ قاھارمانى عانا ەمەس، قازاق حالقىنىڭ رۋحىن، ۇلتتىق نامىسىن، اسكەري ارىن بۇكىل الەمگە تانىتقان بىرەگەي تۇلعا. كەڭەس داۋىرىندە ونىڭ ەرلىگىنە كۇمان بولعان جوق. اسىرەسە، 1941 جىلى ماسكەۋدى قورعاۋ كەزىندەگى جانقيارلىق شايقاستاردا ءوزى باستاعان باتالونمەن جاۋ تىلىنا 27 رەت ارنايى تاپسىرمالاردى ورىنداۋ ءۇشىن ەنىپ، كۇردەلى اسكەري وپەراسيالاردى ءساتتى جۇزەگە اسىردى. سونداي-اق، وسى ەرلىگى 316-اتقىشتار ديۆيزياسىنىڭ 8-گۆارديالىق ديۆيزياعا اينالۋىنا نەگىز بولدى. بۇل ەرلىك ارحيۆ دەرەكتەرىمەن دە تولىق راستالدى. ءبىراق مىنەزىنىڭ تىك، شىنشىل، جوعارى شەندى قولباسشىلارمەن جانە بيلىككە جاعىنبايتىن قايسارلىعىنىڭ سالدارىنان لايىقتى جوعارى ماراپات دەر كەزىندە بەرىلمەدى. سوندىقتان مەملەكەت باسشىسىنىڭ ماراپاتى تەك جەكە ادامعا ەمەس، تۇتاس حالىقتىڭ ماقتانىشىنا، ادال ەڭبەگى مەن تەرەڭ ەرلىگىنە بەرىلگەن ءادىل باعا بولدى، - دەدى ول.
ءىس-شارا بارىسىندا قاتىسۋشىلار باۋىرجان مومىش ۇلىنىڭ مۇراسى ارقىلى جاستاردى تاربيەلەۋدىڭ عىلىمي، پەداگوگيكالىق، اسكەري جانە ادەبي ماسەلەلەرى، سونداي-اق تاريحي تۇلعانىڭ اسكەري ستراتەگياسى مەن تاكتيكاسىن، سوعىس پسيحولوگياسى ءىلىمىن اسكەري وقۋ ورىندارىنىڭ بارلىق ساتىسىندا وقىتۋ مەن ونى قولدانۋ اياسىن كەڭەيتۋ ماسەلەلەرى تالقىلادى.