ەلىمىزدەگى باستى ۇلتتىق مەرەكە – رەسپۋبليكا كۇنى قايتا جاڭعىرۋىنىڭ رامىزدىك ءمانى ادىلەتتىلىك ۇستانىمىنا ۇندەس. 1990 جىلى 25 قازاندا قابىلدانعان «قازاق كسر-نىڭ مەملەكەتتىك ەگەمەندىگى تۋرالى» دەكلاراسيا قازاقستاننىڭ تاۋەلسىزدىك الۋىنا جول اشقان ماڭىزدى قۇجات بولاتىن.
دەكلاراسيادا قازاقستاننىڭ تاۋەلسىز مەملەكەت رەتىندەگى ساياسي-قۇقىقتىق نەگىزدەرى جاريا لاندى. العاش رەت ەل اۋماعىنىڭ تۇتاستىعى، قازاق حالقىنىڭ جانە قازاقستانداعى باسقا دا ۇلت وكىلدەرىنىڭ مادەنيەتىن، ءداستۇرىن، ءتىلىن قايتا تۇلەتۋ، ۇلتتىق بولمىستى قالىپتاستىرۋ ءارى نىعايتۋ سياقتى مەملەكەتتىك قاعيداتتار ادىلەتتىلىك ۇستانىمىنا ساي انىقتالدى. ەلىمىزدىڭ جەكە تەرريتورياسى، ازاماتتىعى، مەملەكەتتىك بيۋدجەتى، حالىقارالىق قاتىناستارداعى دەربەستىگى، مەملەكەتتىك رامىزدەرى بەكىتىلدى. «قايتا جاڭعىرعان رەسپۋبليكا كۇنى – بۇل حالقىمىزدىڭ رۋحىن كوتەرىپ، ەلدىگىمىزدى نىعايتا تۇسەتىن اسا ماڭىزدى تاريحي قادام»، – دەگەن ەل پرەزيدەنتى قاسىم-جومارت توقايەۆ «رەسپۋبليكا» ءسوزى لاتىن تىلىنەن اۋدارعاندا، «ورتاق ءىس» دەگەن ماعىنا بەرەتىنىن اتاپ ءوتىپ، رەسپۋبليكا ءوز ىسىنە جاۋاپتى ازاماتتاردىڭ ورتاق ىس-ارەكەتىنىڭ ارقاسىندا قۇرىلاتىنىنا توقتالدى.
«ادىلەتتى قازاقستاندا ەكونوميكالىق ساياسات ازاماتتاردىڭ ءوز قارىم-قابىلەتىن ىسكە اسىرۋعا، وتانداستارىمىزدىڭ تۇرمىس ساپاسىنىڭ ۇدايى جاقسارۋىنا مول مۇمكىندىكتەر مەن تەڭ جاعداي جاساۋعا باعىتتالادى. سونداياق، سوت جۇيەسى مەن قۇقىق قورعاۋ سالاسىنداعى رەفورمالار جالعاسادى، زاڭ مەن ءتارتىپ ازاماتتاردىڭ مەملەكەتكە دەگەن سەنىمىن ارتتىرۋدىڭ نەگىزگى فاكتورىنا اينالادى. ادامدار – ءبىزدىڭ باستى بايلىعىمىز، ەكونوميكالىق جانە قوعامدىق دامۋدىڭ باستى قوزعاۋشى كۇشى. سوندىقتان ءبىز ادام الەۋەتىن ارتتىرۋعا باعىتتالعان ستراتەگيالىق ينۆەستيسيانى ۇلعايتامىز، جاستارىمىز بەن الەۋمەتتىك ءالسىز ساناتتاعى ازاماتتارىمىزدى جان-جاقتى قولداي-مىز»، – دەگەن پرەزيدەنت قاسىمجومارت توقايەۆ ساياسي رەفورمالاردىڭ باستى قاعيداسىن ادىلەتتىلىك دەپ انىقتادى.
تاۋەلسىزىكتىڭ تاڭى اتقان تاريحي تاعدىرلى ساتتە دە ادىلەتتىلىك قاعيداتى «ەگەمەندىك دەكلاراسياسىنىڭ» باستى ۇستانىمى بولعاندىعى سول كەزەڭدەگى دەپۋتاتتاردىڭ قازاق كسر جوعارعى سوۆەتىنىڭ ەكىنشى سەسسياسىنداعى قىزۋ تالقىسىنان كورىنىس تاپقان. ۇلت مۇددەسىن كوزدەگەن مەملەكەتشىل تۇلعالار ماڭىزدى قۇجاتتىڭ قابىلدانۋى ءۇشىن جانە ادىلەتتىلىك قاعيداتىنا س اي قۇرىلۋى ءۇشىن بيىك مىنبەرلەردە ءسوز سويلەپ، تەر توكتى. قارسىلىقتار مەن بۇرمالاۋشىلىقتارعا توتەپ بەرىپ، تاۋەلسىزدىكتىڭ العاشقى ىرگەتاسىن قالاپ بەردى. سوندىقتان دا بۇل ماڭىزدى داتانىڭ ەل جادىنداعى ءمانى زور. مەرەكەنى اتاپ وتۋمەن قاتار، ونىڭ رامىزدىك ءمانى مەن مازمۇنىن اشىپ، تاۋەلسىزدىگىمىزدىڭ تۇعىرلى بولۋىنا كۇش جۇمساۋ ماڭىزدى. وسى ەگەمەندىكتىڭ وزەكتى قاعيداتى، ادىلەتتىلىك ۇستانىمىنىڭ باستى قۇندىلىعى ابايدىڭ رۋحاني مۇرالارىندا تاڭبالانعانىن اڭعارامىز.
اباي ءۇشىن ادىلەت – قايرات پەن اقىلدى جۇرەككە بيلەتىپ ارەكەت جاساعاندا قول جەتكىزەرلىك ناتيجە. دەمەك، ادىلەت – حاقتىقتىڭ جولىن نيەت قىلعان، جۇرەگىنە حاققا دەگەن ماحابباتتى ورنىقتىرعان، ونىڭ ماحابباتپەن جاراتقان حالقىن سۇيگەن ناعىز ەردىڭ مۇرات قىلعان اسىل قاسيەتى. ادىلەت ناعىز ەرگە – «تولىق ادامعا» ءتان قاسيەت رەتىندە ادام بويىندا قايرات، اقىل جانە جۇرەكتىڭ ۇيلەسىمدى قىزمەتى ارقىلى راۋىشتەنبەك. اقىل مەن قايرات جانە جۇرەك ۇشتىگىن ۇنەمى بىرى-بىرىمەن ۇشتاستىقتا، ۇيلەسىمدە تارقاتىپ ايتۋ ابايدىڭ بۇكىل ەتيكالىق-ديداكتيكالىق عيبراتىنان كورىنىس بەرەدى. باستى ۇلتتىق يدەيامىز – ەلىمىزدىڭ ەگەمەندىگىن ساقتاپ، نىعايتۋ بولعاندىقتان، ەگەمەندىكتىڭ ەڭ العاشقى قۇقىقتىقزاڭنامالىق نەگىزىن قالاعان جانە بۇگىنگى ساياسي دامۋىمىزدىڭ وزەگىن قۇراعان قۇجاتتىڭ ۋاقىت وتكەن سايىن وزەكتىلىگى ارتا ءتۇسۋى، سونداي-اق وسى تاريحي داتانىڭ ۇلتتىق مەرەكە رەتىندە انىقتالۋى – تاريحي ادىلەتتىلىككە ساي زاڭدى قۇبىلىس.