تالدىقورعان ستانسياسى ماڭىنداعى جەكەمەنشىك كىرمە جولدا بەس سيستەرنا وزدىگىنەن قوزعالىپ، سونىڭ سالدارىنان تالدىقورعان – قارابۇلاق باعىتىنداعى تەمىرجول قاتىناسى ۋاقىتشا توقتاتىلدى، دەپ حابارلايدى Aqshamnews.kz ءتىلشىسى.
وقيعا 31 قاڭتاردا ساعات 21:36-دا Bars Build كومپانياسىنا تيەسىلى كىرمە جولدىڭ №215 قوسۋ جولىندا بولعان. جۇك تيەلگەن بەس سيستەرنا كۇتپەگەن جەردەن ورنىنان قوزعالىپ كەتىپ، ولاردىڭ ەكەۋى №214 ساقتاندىرۋ جولىنداعى تۇيىق تىرەۋگە سوعىلعاننان كەيىن رەلستەن شىققان. زارداپ شەككەندەر جوق، سونداي-اق سيستەرناداعى سۇيىقتىقتىڭ توگىلۋى نەمەسە اعۋى تىركەلمەگەن.
اپات سالدارىن جويۋ ءۇشىن وقيعا ورنىنا 25 مامان جانە 7 تەحنيكا جۇمىلدىرىلعان. 1 اقپان ساعات 00:25-تەن باستاپ تالدىقورعان – قارابۇلاق ارالىعى قوزعالىسقا جابىلىپ، سالدارىنان №3604 پويىزى جولدا كىدىرگەن.
قازاقستان تەمىر جولى وقيعا كومپانيانىڭ جاۋاپكەرشىلىك ايماعىنا كىرمەيتىن جەكەمەنشىك جولدا بولعانىن اتاپ ءوتتى. ءقازىر ارنايى كوميسسيا قۇرىلىپ، ۆاگونداردىڭ وزدىگىنەن قوزعالۋ سەبەپتەرى انىقتالىپ جاتىر.