جۇرەككە جىلۋ ۇيالاتقان سۋرەت
جاۋىنگەر مەن كىشكەنتاي بالانىڭ سۋرەتى ينتەرنەتتە الەۋمەتتىك جەلى پاراقشالارىندا ستاتۋستارعا ءجيى قويىلىپ، تەز تاراپ كەتتى. جۇرەككە ەرىكسىز جىلىلىق سىيلايتىن بۇل سۋرەتتى قوعام جاقسى قابىلدادى. بەيبىت جاۋىنگەردىڭ بەينەسى.
ءبىر قاراعاندا قولمەن سالىنعان سياقتى سۋرەت كورىنگەنمەن، بۇل - شىنايى كورىنىس. سۋرەتتەگى سارباز – ۇلتتىق ۇلاننىڭ جاۋىنگەرى ەكەن. قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنا قاراستى 6698 اسكەري بولىمىندە قىزمەت ەتەتىن ەفرەيتور شاحرۋح حاسانوۆ قاڭتاردىڭ 4ء-ى كۇنى دابىل بەلگىسىمەن قىزمەتكە كەلگەنىن ايتادى. ولار شىمكەنت قالالىق اكىمدىكتىڭ ماڭىنا قوعامدىق ءتارتىپ پەن قاۋىپسىزدىكتى قامتاماسىز ەتۋ قىزمەتىنە شىققان. بۇل تۋرالى قازاقستان رەسپۋبليكاسى ۇلتتىق ۇلانى «وڭتۇستىك» وڭىرلىك قولباسشىلىعىنىڭ باسپا ءسوز قىزمەتى حابارلادى.
ايگىلى سۋرەت 7 قاڭتاردا تۇسىرىلگەن ەكەن. اكىمدىك الدىنداعى الاڭدا قىزمەت اتقارىپ تۇرعان جاۋىنگەرگە ءبىر كىشكەنتاي بالاقاي جۇگىرىپ كەلىپ، سالەم بەرىپتى. جاۋىنگەر دە بالانىڭ قولىن قايتارماي، سالەمىن الىپ، باسىنان سيپاپ، اكەسىنە قاراي جىبەرگەن. اكەسىنىڭ ايتۋى بويىنشا نەشە كۇن ۇيدە قامالىپ وتىرعان بالا ابدەن زەرىگىپ، دالاعا سەرۋەنگە شىققانىنا قاتتى قۋانعان. ال وسى ءساتتى سول ماڭايدا ءتۇسىرىلىم جاساپ جۇرگەن «OTYRAR TV» جۋرناليستەرى ءتۇسىرىپ العان.
ەفرەيتور شاحرۋح حاسانوۆتىڭ ۇلتتىق ۇلاندا قىزمەت ەتىپ جاتقانىنا 10 جىل بولىپتى. ۇيلەنگەن، ەكى ۇلى بار. ۇلدارى دا اكە جولىن قۋىپ، اسكەري بولامىز دەيدى.
