EQonaq اقپاراتتىق جۇيەسىنىڭ دەرەكتەرىنە سايكەس، 2024 جىلدىڭ العاشقى جارتىجىلدىعىندا شىمكەنت قالاسىنا 20 950 شەتەلدىك تۋريست كەلگەن.
بۇل كورسەتكىش ەلىمىزدەگى ءۇشىنشى مەگاپوليسكە حالىقارالىق تۋريستىك ارەنادا سۇرانىستىڭ ارتىپ كەلە جاتقانىنىڭ ايقىن دالەلى. شىمكەنتكە ەڭ كوپ تۋريست – وزبەكستان، رەسەي فەدەراسياسى جانە قىتايدان كەلگەن، دەپ حابارلايدى aqshamnews.kz تۋريزم جانە سپورت مينيسترلىگىنە سىلتەمە جاساپ.
اتاپ ايتقاندا، بيىلعى التى ايدا شىمكەنتكە وزبەكستاننان – 9 235، رەسەي فەدەراسياسىنان – 3 286، ال قىتايدان 2360 تۋريست ساياحاتتاعان. وڭىردە تۋريستەر سانىنىڭ ارتۋىمەن قاتار، ءبىرجولعى توسەك-ورىندار سانى دا ايتارلىقتاي ۇلعايىپ كەلەدى.
ماسەلەن، 2023 جىلى توسەك-ورىن سانى 6058-گە جەتكەن. بۇل 2022 جىلمەن سالىستىرعاندا 542 ورىنعا كوپ.
«وڭىردەگى تۋريستەر سانىنىڭ ءوسۋى تۋريستىك ينفراقۇرىلىمدى جاقسارتۋعا جانە قوناقتار ءۇشىن قولايلى جاعداي جاساۋعا باعىتتالعان ەلەۋلى جۇمىستاردىڭ ناتيجەسى. ءبىز شىمكەنتتى قازاقستانداعى جانە شەتەلدەگى جەتەكشى تۋريستىك باعىتتاردىڭ بىرىنە اينالدىرۋ ءۇشىن جۇمىس ىستەيمىز»، - دەدى تۋريزم يندۋسترياسى كوميتەتىنىڭ ءتوراعاسى نۇرتاس كارىپبايەۆ.