الماتىدا اتىشۋلى يگور دۋجنوۆتىڭ ءىسى بويىنشا الدىن الا سوت تىڭدالىمى باستالدى. سوتتالۋشى يگور دۋجنوۆ ءىستى القابيلەردىڭ قاراۋىنان باس تارتتى. ال مەملەكەتتىك ايىپتاۋشى تۇتقىننىڭ ءوزىن وتباسىمەن بىرگە ۇيدەن قۋىپ شىقپاق بولعان بەس ادامدى قالاي ولتىرگەنىن اشىپ ايتىپ بەردى، دەپ حابارلايدى اlmaty-akshamy.kz كتك ارناسىنا سىلتەمە جاساپ.
وقيعا بولعان كۇنى سوت ورىنداۋشىسى ابەنوۆ، ءۇيدىڭ جاڭا يەسى تۇرعانوۆ، ادۆوكاتتىڭ كومەكشىسى ساكەنوۆ، بوكەنوۆتىڭ قورعانشىلىق ورگانىنىڭ وكىلى كۋاگەر رەتىندە ساقوۆا مەن بەكتاشۇعلى قاقپانىڭ اشىلعان ءساتىن پايدالانىپ، ءۇيدىڭ اۋلاسىنا كىرەدى. بۇل كەزدە دۋجنوۆ وتباسىن ۇيدەن شىعاراتىنىن ءتۇسىنىپ، ولارمەن ەرەگەسە، بۇرىن قۇرعان جوسپارىن ىسكە اسىرماق بولادى. دۋجنوۆ گاراجعا كىرىپ، اتۋ ءۇشىن الدىن الا دايىندالعان 10 پاترونى بار ۆەكتور-307 كارابينىن العان”، – دەدى قازاقستان رەسپۋبليكاسى باس پروكۋراتۋراسى قىلمىستىق قۋدالاۋ قىزمەتىنىڭ پروكۋرورى شىڭعىسحان پۇسىرمانوۆ.
تەرگەۋدە دۋجنوۆتىڭ ادامداردى قابىرعاعا ءتىزىلىپ تۇرۋعا ماجبۇرلەگەنىن، كەيىن ولاردى بىرىنەن سوڭ ءبىرى اتا باستاعانىن انىقتادى. سودان كەيىن ول سىرتقا شىعىپ، پوليسياعا وق جاۋدىردى، ءبىراق ولار كولىكتىڭ ارتىنا جاسىرىنىپ ۇلگەرگەن. ءتارتىپ ساقشىلارىنىڭ ءبىرى وق اتقان ادامدى زالالسىزداندىرىپ ۇلگەردى. دۋجنوۆ كارابيننەن بارلىعى 10 رەت وق اتسا، ونىڭ توعىزىن نەبارى سەگىز سەكۋندتا اتقان.
“جەردە جاتقان مايىتتەردى كورگەن دۋجنوۆ ءوز جوسپارىنىڭ ىسكە اسقانىنا كوز جەتكىزەدى. وسىدان كەيىن دە باسقا ادامداردى ىزدەي باستايدى. وسى كەزدە اۋلاعا جۇگىرىپ كىرگەن ابدۋلين دۋجنوۆتان كارابيندى تارتىپ الىپ، ادامدارعا وق جاۋدىرۋىنا جول بەرمەگەن”، – دەدى قازاقستان رەسپۋبليكاسى باس پروكۋراتۋراسى قىلمىستىق قۋدالاۋ قىزمەتىنىڭ پروكۋرورى شىڭعىسحان پۇسىرمانوۆ.
دۋجنوۆقا بىردەن "ادام ءولتىرۋ" جانە "بيلىك وكىلىنە كۇش قولدانۋ" باپتارى بويىنشا ايىپ تاعىلىپ وتىر. باستى سوت وتىرىسى 29 ناۋرىزعا بەلگىلەنگەن.