بوكستان وليمپيادا چەمپيونى سەرىك ساپييەۆ سوققىعا جىعىلدى دەگەن اقپاراتتى پوليسيا راستادى، دەپ حابارلايدى aqshamnews.kz
وقيعا 21 قاڭتار كۇنى كەشكى ۋاقىتتا قاراعاندى قالاسىنىڭ بۇقار جىراۋ داڭعىلى بويىندا بولعان. جەلىدەگى دەرەكتەرگە سايكەس، ساپييەۆكە دەنە جاراقاتىن سالعان كۇدىكتى رەتىندە ونىڭ ورىنباسارى داۋرەن ەسىمحانوۆ اتالادى.
وبلىستىق پوليسيا دەپارتامەنتى بۇل دەرەكتى راستادى.
- 42 جاستاعى قاراعاندى قالاسىنىڭ تۇرعىنىنىڭ ارىزى نەگىزىندە ۇرىپ-سوعۋ دەرەگى بويىنشا قىلمىستىق ءىس قوزعالدى. 21 قاڭتار كۇنى قالاداعى سپورت كەشەندەرىنىڭ بىرىندە ەكى ەر ادام اراسىندا جانجال تۋىنداعان، – دەيدى پوليسەيلەر.
قازىرگى ۋاقىتتا پوليسيا قىزمەتكەرلەرى بولعان وقيعانىڭ بارلىق ءمان-جايىن انىقتاۋ جۇمىستارىن جۇرگىزۋدە. تەرگەۋ مۇددەسىنە بايلانىستى وزگە اقپارات جاريالاۋعا جاتپايدى.