كورمە 1 قاراشاعا دەيىن جالعاسادى
بيىل حالىق ءارتيسى، حالىق قاھارمانى، وپەرا جانە ەسترادا ءانشىسى روزا باعلانوۆانىڭ تۋعانىنا 100 جىل تولىپ وتىر. مەرەيتويعا وراي الماتى مۋزەيىندە "قازاق دەگەن حالىقتىڭ ەركەسىمىن!" كورمەسى ۇيىمداستىرىلدى، دەپ حابارلايدى Almaty-akshamy.kz Zakon.kz-كە سىلتەمە جاساپ.
الماتى مۋزەيىنە كىرەبەرىستە اڭىز ءانشى روزا باعلانوۆانىڭ ورىنداۋىنداعى "اق ماڭدايلىم" ءانى شىرقالىپ تۇر. وسىدان-اق كەلۋشىلەر مۋزەيدە كىمنىڭ كورمەسى ۇيىمداستىرىلىپ جاتقانىن اڭداي الادى. ال مۋزەيدىڭ ەكى بولمەسىنە حالىق ءارتيسىنىڭ جەكە زاتتارى، ساحنالىق كوستيۋمدەرى، اشەكەي بۇيىمدارى، تۇرمىستىق زاتتارى، ماراپاتتارى، مەدالدارى مەن فوتو-سۋرەتتەرى قويىلعان.
جەكە اشەكەيلەرى جىلتىراپ، كوزدىڭ جاۋىن الادى. ۇقىپتى ساقتالعانى بىردەن بايقالىپ تۇر. ءارتيستىڭ جەكە زاتتارى مەن اتا-اناسىنان قالعان بۇيىمداردى بۇگىندە ءانشىنىڭ ۇلى تاجەن باعلانوۆ پەن كەلىنى مارال باعلانوۆا كوزىنىڭ قاراشىعىنداي ساقتاپ وتىر. وسى كورمەگە ارناپ ءانشىنىڭ كەلىنى مەن مۋزەي قىزمەتكەرلەرى بارلىعى 300-گە جۋىق جادىگەردى تاڭداپ الىپتى.
«مىنا زاتتىڭ ءبارى ءبىزدىڭ ۇيدە تۇرعان. مۋزەي قىزمەتكەرلەرى قاسىما ەكى كومەكشى بەرگەن سوڭ بۇكىل بۇيىمدى ولارعا كورسەتتىم. قىزمەتكەرلەر جادىگەرلەردى وزدەرى تاڭداپ الدى. ولار زاتتاردىڭ بارلىعىن كورسەتۋگە، كورمەگە ادەمىلەپ ورنالاستىرۋعا تىرىستى»، - دەدى حالىق ءارتيسىنىڭ كەلىنى مارال باعلانوۆا.
سونىمەن قاتار مارال باعلانوۆا كورمەگە قويىلعان زاتتار بۇكىل قازاق جۇرتىنا تاريحتىڭ بولشەگى رەتىندە قورەك بولادى دەپ ويلايتىنىن ايتتى.
«اپامىزدىڭ 100 جىلدىعى وتباسىمىز ءۇشىن ەرەكشە ءوتىپ جاتىر. ءبىراز قوبالجىپ ءارى قۋانىپ ءجۇرمىز. مۋزەيدەن كورمە اشايىق دەپ اتسالىسقان ۇيىمداستىرۋشىلارعا العىسىمىزدى بىلدىرەمىز. اپامىزدان، اڭىز ادامنان قالعان بۇيىمدار بارىمىزگە قورەك بولادى دەپ ويلايمىن»، - دەيدى مارال باعلانوۆا.
"قازاق دەگەن حالىقتىڭ ەركەسىمىن!" كورمەسى 1 قاراشاعا دەيىن جالعاسادى. الماتى مۋزەيلەر بىرلەستىگىنىڭ باس قور ساقتاۋشىسى راۋزيا تۇرسىنبەكوۆانىڭ ايتۋىنشا، كورمەنىڭ ەرەكشەلىگى - حالىق ءارتيسىنىڭ كورمەسى العاش رەت ۇلكەن كولەمدە ۇيىمداستىرىلۋى. مۋزەي قىزمەتكەرلەرى ءدال وسى مادەني وردادا كورمە اشىلعانىن ۇلكەن قۇرمەت دەپ سانايدى.