الماتىنىڭ تۇركسىب اۋدانىندا اۋماقتاردى اباتتاندىرۋ جۇمىستارى قارقىندى تۇردە جالعاسىپ كەلەدى. اۋدان تۇرعىندارىنىڭ يگىلىگى ءۇشىن بىردەن بىرنەشە جاڭا دەمالىس ايماقتارى – سەرۋەن اللەيالارىنان باستاپ سپورت الاڭدارىنا دەيىن اشىلدى. بۇل تۋرالى تۇركسىب اۋدانىنىڭ اكىمدىگى حابارلادى.
جاس قانات شاعىناۋدانىندا، حاسانعالي ۇلى كوشەسىندە، جايلى قوعامدىق كەڭىستىك قۇرىلدى: اسفالت جانە تروتۋار تاستارى توسەلىپ، كوگال ەگىلدى، جارىقتاندىرۋ مەن بەينەباقىلاۋ كامەرالارى، پەرگولالار، ورىندىقتار جانە قوقىس جاشىكتەرى ورناتىلدى. ەندى مۇندا تۇرعىندار تازا اۋادا جايلى جاعدايدا ۋاقىت وتكىزە الادى.
سونداي-اق، جاس قانات شاعىناۋدانىندا (1/42 ءۇي) بالالار جانە سپورت الاڭى جاڭارتىلدى. فۋتبول الاڭى جوندەلىپ، رەزەڭكە جابىنى اۋىستىرىلدى، جاڭا ويىن كەشەندەرى، جاتتىعۋ قۇرىلعىلارى، كوشە شامدارى مەن قورشاۋلار ورناتىلدى. جاڭارعان اۋماق اۋدان بالالارى مەن جاسوسپىرىمدەرىنىڭ سۇيىكتى دەمالىس ورنىنا اينالدى.
ماگنيتنايا كوشەسىندە زاماناۋي سەرۋەن ايماعى اباتتاندىرىلدى. مۇندا تروتۋار تاس توسەلىپ، ورىندىقتار مەن قوقىس جاشىكتەرى، ساندىك پەرگولالار جانە سۋارۋ جۇيەسى ورناتىلدى. بۇل اۋماق شاعىناۋدان تۇرعىندارى ءۇشىن جاڭا جايلى سەرۋەن جانە دەمالىس ورنىنا اينالدى.
ايماۋىتوۆ كوشەسىندە جارىقتاندىرۋى، ورىندىقتارى جانە ساندىك ەلەمەنتتەرى بار جاياۋ جۇرگىنشىلەر ايماعى پايدا بولدى.
بۋلۆار بويىن جاس سۋرەتشىلەردىڭ قىلقالامىنان تۋعان كارتينالار كورىكتەندىرىپ، كەڭىستىككە شىعارماشىلىق لەپ پەن ەرەكشە بولمىس سىيلادى.
«ءاربىر جاڭا ايماق – بۇل تۇرعىندار مەن قالا قوناقتارى بەلسەندى دەمالىپ، سپورتپەن اينالىسىپ، ۋاقىتىن ءتيىمدى وتكىزە الاتىن جايلى، ءقاۋىپسىز جانە زاماناۋي قالالىق ورتانى قالىپتاستىرۋ جولىنداعى تاعى ءبىر قادام»، – دەدى اۋدان اكىمدىگىنىڭ وكىلدەرى.