13 جىلدا حالىق سانى 1،6 ملن ادامعا وسكەن.
وسى جىلدىڭ 1 تامىزىنداعى جاعداي بويىنشا، قىرعىزستان حالقىنىڭ سانى 6 ميلليون 977 مىڭ ادامدى قۇرادى. ساناق ناتيجەلەرىن وڭدەۋدىڭ العاشقى كەزەڭدەرىنىڭ ناتيجەلەرى بويىنشا ناقتى ستاتيستيكا انىقتالا باستادى، دەپ حابارلايدى Almaty-akshamy.kz Inbusness.kz سىلتەمە جاساپ.
«2022 جىلدىڭ ماۋسىم-تامىز ايلارىندا ۇلتتىق ستاتيستيكا كوميتەتى قىرعىزستاننىڭ 2022 جىلعى حالىق ساناعى مەن تۇرعىن ءۇي قورىنىڭ دەرەكتەرىن وڭدەۋدىڭ ءبىرىنشى كەزەڭىن وتكىزدى. 2022 جىلعى تامىزدان باستاپ ادام سانىن ەسەپتەۋ 2022 جىلعى حالىق ساناعىنىڭ قورىتىندىسى نەگىزىندە جۇرگىزىلەدى جانە 1 تامىزداعى جاعداي بويىنشا 6 ملن 977 مىڭ ادامدى قۇرادى»، - دەلىنگەن قىرعىزستان رەسپۋبليكاسىنىڭ ۇلتتىق ستاتيستيكا كوميتەتىنىڭ حابارلاماسىندا.
قىرعىزستاننىڭ تۇراقتى حالقىنىڭ سانى 2009 جىلعى ساناقپەن سالىستىرعاندا 13 جىلدا 1،6 ملن ادامعا ءوستى جانە جىل سايىنعى ورتاشا ءوسۋ قارقىنى 2،1% قۇرادى.
قىرعىزستان ۇلتتىق ستاتكومىنىڭ ايتۋىنشا، وڭدەۋ كەزەڭى اياقتالعاننان كەيىن، 2023-2024 جىلدار ىشىندە حالىقتىڭ ەكونوميكالىق بەلسەندىلىگى مەن جۇمىسپەن قامتىلۋى بويىنشا 2022 جىلعى حالىق ساناعى مەن تۇرعىن ءۇي قورىنىڭ قىسقاشا قورىتىندىلارىن، سونداي-اق رەسپۋبليكا وڭىرلەرى، حالىقتىڭ كوشى-قونى، تۇرعىن ءۇي قورى مەن حالىقتىڭ تۇرعىن ءۇي جاعدايلارى، رەسپۋبليكانىڭ ءۇي شارۋاشىلىقتارى مەن وتباسىلارىنىڭ قۇرامى بولىنىسىندە دەرەكتەردى سيپاتتايتىن جاريالانىمدار شىعارىلاتىن بولادى.
«قازىرگى ۋاقىتتا تۇزەتۋ كەزەڭى جۇرگىزىلۋدە، ونىڭ بارىسىندا الىنعان دەرەكتەر لوگيكالىق قاتەلەرگە تەكسەرىلەدى جانە اعىمداعى دەموگرافيالىق ەسەپكە الۋ دەرەكتەرىمەن سالىستىرىلاتىن بولادى. بۇل كەزەڭ اعىمداعى جىلدىڭ سوڭىنا قاراي اياقتالادى»، - دەپ ناقتىلادى ۆەدومستۆودا.