ققس مولشەرلەمەسىن ارتتىرۋ جانە سارالاۋ بيۋدجەتتىڭ مۇنايدان تۇسەتىن وزگەرمەلى كىرىستەرىنە تاۋەلدىلىگىن ازايتۋعا جانە مەملەكەتتىك باسىم جوبالاردى قارجىلاندىرۋعا مۇمكىندىك بەرەدى، دەپ حابارلايدى aqshamnews.kz
ءوز كەزەگىندە ۇلتتىق ەكونوميكا ۆيسە-مينيسترى ازامات ءامرين سالىق رەفورماسى شەڭبەرىندە ققس سارالانعان مولشەرلەمەلەرىن بەلگىلەۋ جونىندەگى ۇكىمەتتىڭ ۇسىنىستارىن ايتتى.
«ءبىز مىناداي تەتىكتى قاراستىرۋدى ۇسىنامىز: جالپى بەلگىلەنگەن ققس مولشەرلەمەسى 16%، اۋىل شارۋاشىلىعى ونىمدەرىن وندىرۋشىلەردى ققس-تان تولىق بوساتۋ، ال ءبىرقاتار سالالار ءۇشىن – 10% مولشەرىندەگى ارالىق مولشەرلەمە. وسىلايشا، ۇكىمەت ۇسىنىپ وتىرعان مولشەرلەمەلەردى سارالاۋ: 16%، 10%، 0% جانە بوساتۋ»، دەپ ءتۇسىندىردى ازامات ءامرين.
قازىرگى ۋاقىتتا اگرارلىق سەكتوردا شارۋا قوجالىقتارى ققس تولەمەيتىنى، ال زاڭدى تۇلعالار قولدا بار جەڭىلدىكتەرگە بايلانىستى بيۋدجەتكە تولەۋگە ءتيىستى سالىقتاردىڭ تەك 30%-ىن تولەيتىنى اتاپ ءوتىلدى. جاڭا تەتىكتەر بويىنشا ولاردىڭ ەشقايسىسى ققس تولەمەيتىن بولادى. بۇل قازاقستاندىق اۋىل شارۋاشىلىعى ونىمدەرىن (كارتوپ، قىزاناق، پياز جانە باسقالارى) باسەكەگە قابىلەتتى ەتۋگە مۇمكىندىك بەرەدى. 10% مولشەرلەمە قولدانىلاتىن سالالاردىڭ تۇرلەرى بيزنەسپەن ءالى دە تالقىلانۋدا.
سونداي-اق كەزدەسۋدە جەڭىلدەتىلگەن دەكلاراسيا مەن بولشەك سالىق رەجيمىن، ونىڭ ءمانى – كىرىس شەگىن جىلىنا 600 مىڭ اەك (2 ملرد 359 ملن تەڭگە) مولشەرىندە ساقتاي وتىرىپ، قايتا قاراۋ بويىنشا ۇسىنىستار ايتىلدى. نەگىزگى وزگەرىس – بۇل رەجيمدى تەك B2C سەگمەنتىندە (بولشەك ساۋدادا) جۇزەگە اسىرۋ. جۇمىسشىلار سانى بويىنشا شەكتەۋدى الىپ تاستاۋ ۇسىنىلدى. كاسىپكەردىڭ ساتۋدان تۇسكەن تابىسى جىلىنا 100 ملن تەڭگەدەن اساتىن بولسا، سالىق سالىناتىن تابىستى ەڭبەكاقى قورى (ەڭبەكاقى تولەۋ قورى) سوماسىنا ازايتۋ مۇمكىندىگى كوزدەلگەن. وسىلايشا، 100 ملن تەڭگە شەگى جالاقىنى اقتاۋعا ىنتالاندىرۋعا مۇمكىندىك بەرەدى. بۇل رەتتە بولشەك سالىقتىڭ 4% مولشەرلەمەسى (ءماسليحاتتاردىڭ 50%-عا تومەندەتۋ مۇمكىندىگىمەن) ساقتالادى.
سالىق رەفورماسىن ىسكە اسىرۋ كەزىندە ەل بيۋدجەتىنە تۇسەتىن سالىق تۇسىمدەرى جىل سايىن 4-5 ترلن تەڭگەگە ارتادى دەپ كۇتىلەدى. بۇل قاراجات ۇلتتىق قورعا تاۋەلدىلىكتى ازايتۋعا؛ مەملەكەتتىك قارىز دەڭگەيىن تومەندەتۋ جانە ينۆەستيسيالىق جوبالاردى نەسيەلەۋگە، دامۋ ينستيتۋتتارىن نىعايتۋعا، ءتۇرعىن-ۇي كوممۋنالدىق شارۋاشىلىقتى، جىلۋ-ەنەرگەتيكا جۇيەسىن جاڭعىرتۋعا قوسىمشا رەسۋرستاردى باعىتتاۋعا كومەكتەسەدى.