قول تەرىسى بەت پەن دەنە تەرىسىنە قاراعاندا جۇقا. سوندىقتان ونىڭ كۇتىمىنە دە ەرەكشە ءمان بەرگەن ءجون.
كۇندەلىكتى قاراپايىم ارەكەتتەر دەنساۋلىعىڭىزعا جانە قول تەرىسىنىڭ سۇلۋلىعىنا زيان كەلتىرىپ جاتقانىن بايقاماۋىڭىز مۇمكىن. قول تەرىسىنىڭ ەرتە قارتايۋىنا ىقپال ەتەتىن كوپشىلىك جىبەرەتىن قاتەلىكتەردى ۇسىنامىز، دەپ حابارلايدى Almaty-akshamy.kz Elorda.kz سايتىنا سىلتەمە جاساپ.
بەت پەن دەنە تەرىسىنە قاراعاندا قول تەرىسى وتە جۇقا. سوندىقتان ول جاس ەرەكشەلىگى وزگەرىستەرىنە بەلسەندى ۇشىرايدى. وعان قوسا، كوپشىلىك ادام قولعا بەتكە سەكىلدى ارنايى كۇتىم جاساي بەرمەيدى.
1-قاتەلىك: قولدى سۋعا ءجيى سالۋ جانە تۇرمىستىق حيميا قولدانۋ كەزىندە قولعاپ كيمەۋ
كوپشىلىك ايەل جىبەرەتىن كەڭ تاراعان قاتەلىكتىڭ ءبىرى — ءۇيدى تازالاۋ كەزىندە ارنايى قولعاپ كيمەۋ. تازارتۋشى قۇرالدار مەن ۇنتاقتار، ىدىس جۋاتىن قۇرالدار جانە ۇنەمى قولدى سۋعا سالۋ — مۇنىڭ بارلىعى تەرىنى قۇرعاتادى، ال ول ونىڭ قارتايۋىنا ىقپال ەتەدى.
2-قاتەلىك: تەرىنى ۋاقىتىلى ىلعالداندىرماۋ
تەرى، اسىرەسە، سۋىق مەرزىمدە ىلعال جوعالتاتىنىن بىلەمىز. بۇل جاعدايدى كەڭسە مەن ءۇي ىشىندەگى اۋانىڭ قۇرعاق بولۋى، تۇرمىستىق حيميا قولدانۋ جانە توڭىپ قالۋ ودان ءارى ۋشىقتىرىپ جىبەرەدى. بۇل پروبلەمانى شەشۋ ءۇشىن قولدى كرەم كومەگىمەن ىلعالداندىرۋ جەتكىلىكتى. ءار ىدىس جۋعاننان كەيىن، ءۇي جيناعاننان سوڭ، دالاعا شىعاردا جانە ۇيىقتار الدىندا قولعا كرەم جاعۋدى ادەتكە اينالدىرىڭىز. قولعا ارنالعان كرەمدەردە ءار جەرگە قويىپ قويىڭىز جانە مىندەتتى تۇردە سومكەڭىزدە بىرەۋى بولعانى دۇرىس. سول كەزدە بۇل پايدالى ادەتتى ۇمىتىپ كەتپەيسىز.
3-قاتەلىك: انتيباكتەريالىق قۇرالدى قوسىمشا كۇتىمسىز ءجيى قولدانۋ
انتيباكتەريالىق سابىن، مايلىق نەمەسە سپرەيدى كۇندەلىكتى قولدانۋ — ومىرىمىزگە ەنگەن ادەتتىڭ ءبىرى. ول باكتەريالار مەن ۆيرۋستاردىڭ جۇعۋ ءقاۋپىن ازايتقانىمەن، قول تەرىسىنىڭ جاعدايىنا تەرىس اسەر ەتەدى. انتيباكتەريالىق قۇرالدار تەرىنى قاتتى قۇرعاتادى، سوندىقتان ولاردى ءجيى قولدانساڭىز، تەرىنى ىلعالداندىرىپ تۇرۋدى ۇمىتپاڭىز. سونداي-اق اراسىندا قولدى تۇزدى سۋعا سالىپ، ماسكالار جاساڭىز.
4-قاتەلىك: دالاعا قولعاپسىز شىعۋ
قىستا قول قوسىمشا كۇيزەلىسكە ۇشىرايدى: كوپشىلىك ادامنىڭ قولى توڭعان كەزدە تەرىسى قۇرعايدى، قىزارادى جانە تىتىركەنەدى. مۇنداي پروبلەما ورىن الماس ءۇشىن دالاعا جىلى قولعاپسىز شىقپاعان ءجون.
5-قاتەلىك: SPF-قۇرال قولدانباۋ
قاي مەرزىمدە بولماسىن ءجيى كەزدەسەتىن قاتەلىك — تەرىنى كۇننەن قورعاماۋ. قول بەتكە قاراعاندا كۇن بەلسەندىلىگىنە ءجيى تاپ بولادى. سەبەبى ول تىكە كۇن ساۋلەسىنىڭ استىندا تۇرادى. ۋلتراكۇلگىن تەرىمىزدەگى گيالۋرون قىشقىلىن بۇزادى، ال ول ونىڭ قۇرعاۋىنا جانە اجىمدەردىڭ پايدا بولۋىنا ىقپال ەتەدى. سوندىقتان دا ۇزاق سەرۋەندەۋ كەزىندە نەمەسە دەمالىسقا شىققاندا قول تەرىسىن SPF-قۇرال جاعۋ ارقىلى قورعاۋدى ۇمىتپاڭىز.