قازاقستاندىق بوكسشىلار ماسكەۋدە جەڭىسكە جەتتى

ءۇش بوكسشى شارشى الاڭعا شىقتى

قازاقستاندىق بوكسشىلار بەك نۇرماعانبەت (6-0، 4 كو)، ەۆگەنيي پاۆلوۆ (6-0، 4 كو) جانە دانيلا سەمەنوۆ (5-0، 2 كو) ماسكەۋدەگى بوكس كەشىندە ونەر كورسەتىپ، جەڭىسكە جەتتى، دەپ حابارلايدى Almaty-akshamy.kz Egemen.kz-كە سىلتەمە جاساپ.

بەك نۇرماعانبەت 42 جاستاعى كولۋمبيالىق حوسە ميگەل توررەسپەن (33-12، 27 كو) كەزدەستى جانە ونى العاشقى راۋندتا-اق نوكاۋتقا جىبەردى. ايتا كەتسەك، ب.نۇرماعانبەت سۋپەرورتا سالماقتا WBA International چەمپيونى.

ال اۋەسقوي بوكستا ازيا چەمپيوناتىنىڭ جەڭىمپازى اتانعان. ەۆگەنيي پاۆلوۆ ۆەنەسۋەلالىق بوكسشى ەديكسون پەرەسپەن (24-8، 18 كو) 8 راۋندتىق جەكپە-جەك وتكىزدى. كەزدەسۋ سوڭىنا دەيىن جالعاستى جانە تورەشىلەردىڭ ءبىراۋىزدى شەشىمىمەن ە.پاۆلوۆتىڭ پايداسىنا اياقتالدى.

ايتىپ وتەيىك، ەۆگەنيي دە ەكىنشى اسا جەڭىل سالماقتا WBA International تيتۋلىنا يە. بۇدان بولەك، تورەشىلەردىڭ ءبىراۋىزدى قولداۋىمەن سۋپەر اۋىر سالماقتاعى دانيلا سەمەنوۆ جەڭىسكە جەتتى. ول «پوكەمون» لاقاپ اتىمەن تانىمال ارگەنتينالىق پابلو فارياستان (32-6، 17 كو) ايلاسىن اسىردى.

قازاقستاندىق سپورتشى وپپونەنتتىڭ جەلكەسىنەن سوققى جاساعاندىقتان، تورەشىلەر ودان 1 بالدى شەگەردى. ءبىراق بۇل ونىڭ جەڭىسكە جەتۋىنە كەدەرگى بولمادى.