قازاقستاندا 2025 جىلى مەملەكەتتىك جاردەماقىلار جانە مەملەكەتتىك الەۋمەتتىك ساقتاندىرۋ قورىنان (ءمامس) تولەنەتىن بالا تۋۋىنا جانە بالا 1،5 جاسقا تولعانعا دەيىن كۇتىمىنە بايلانىستى تولەمدەرمەن جالپى 565،7 مىڭ ادام قامتىلىپ، تولەمدەردىڭ جيىنتىق كولەمى 806،8 ملرد تەڭگە بولدى، - دەپ حابارلايدى aqshamnews.kz ءتىلشىسى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ دەرەگىنشە، بالا تۋعان كەزدەگى جاردەماقىنى 2025 جىلى رەسپۋبليكالىق بيۋدجەتتەن 338 مىڭ ادام الدى، وعان جۇمسالعان قارجى 61،1 ملرد تەڭگە بولدى. ال جەلتوقساندا 25،9 مىڭ ادامعا 4،7 ملرد تەڭگە تولەنگەن. بۇل تولەمگە بالا تۋعان، اسىراپ العان نەمەسە قامقورلىققا العان قازاقستان ازاماتتارى، قانداستار جانە ەلدە تۇراقتى تۇراتىن شەتەلدىكتەر ۇمىتكەر بولا الادى.
ەگەر بالا كۇتىمىن جۇزەگە اسىراتىن ادام مىندەتتى الەۋمەتتىك ساقتاندىرۋ جۇيەسىنە قاتىسپاسا، وندا تۋعان، اسىراپ العان نە قورعانشىلىققا العان بالالارى بار (باسقا اتا-انانىڭ وتباسىندا ەسەپتە تۇرماسا)، سونداي-اق وگەي بالالارى بار وتباسىلاردىڭ 1،5 جاسقا دەيىنگى بالا كۇتىمى بويىنشا جاردەماقى الۋعا قۇقىعى بار. ەسەپتى كەزەڭدە بۇل جاردەماقىمەن ورتا ەسەپپەن 125،3 مىڭ ادام قامتىلىپ، تولەم كولەمى 44 ملرد تەڭگەنى قۇرادى. جەلتوقساندا 128،9 مىڭ ادامعا 3،8 ملرد تەڭگە تولەنگەن.
مينيسترلىك مەملەكەتتىك جاردەماقىلاردىڭ مولشەرى جىل سايىن رەسپۋبليكالىق بيۋدجەت تۋرالى زاڭمەن بەكىتىلەتىن ايلىق ەسەپتىك كورسەتكىشكە (اەك) بايلانىستى بەلگىلەنەتىنىن اتاپ ءوتتى.
2025 جىلى بالا تۋۋىنا بەرىلەتىن جاردەماقى مولشەرى:
-
1، 2، 3-بالاعا – 38،0 اەك (149 416 تگ)
-
4 جانە ودان كەيىنگى بالاعا – 63،0 اەك (247 716 تگ)
بالا 1،5 جاسقا تولعانعا دەيىن كۇتىمىنە بايلانىستى اي سايىنعى جاردەماقى:
-
1-بالاعا – 5،76 اەك (22 648 تگ)
-
2-بالاعا – 6،81 اەك (26 777 تگ)
-
3-بالاعا – 7،85 اەك (30 866 تگ)
-
4 جانە ودان كەيىنگى بالاعا – 8،90 اەك (34 995 تگ)
بۇدان بولەك، جۇمىس ىستەيتىن ازاماتتارعا جۇكتىلىك پەن بوسانۋعا (نەمەسە جاڭا تۋعان بالانى اسىراپ الۋعا) بايلانىستى تابىسىنان ايىرىلعان جاعدايدا ءماسق-تان ءبىرجولعى الەۋمەتتىك تولەم تاعايىندالادى. ونىڭ كولەمى ەڭبەككە جارامسىزدىق پاراعى بەرىلگەنگە دەيىنگى سوڭعى 12 ايداعى ورتاشا ايلىق تابىسقا جانە دەمالىس كۇندەرىنىڭ سانىنا تاۋەلدى.
2025 جىلى بۇل ءبىرجولعى تولەمدى 200،8 مىڭ ادام الىپ، جالپى سوما 276،2 ملرد تەڭگەنى قۇرادى. جەلتوقساندا 17،1 مىڭ ادامعا 16،3 ملرد تەڭگە تولەنگەن. ورتاشا تولەم مولشەرى 1 415 135 تەڭگە بولعان.
سونىمەن قاتار ءماسق-تان بالا 1،5 جاسقا تولعانعا دەيىن كۇتىمىنە بايلانىستى تابىسىنان ايىرىلۋ جاعدايى بويىنشا اي سايىنعى الەۋمەتتىك تولەم مىندەتتى الەۋمەتتىك ساقتاندىرۋ جۇيەسىنە قاتىسۋشىلارعا بالانىڭ تۋعان كۇنىنەن باستاپ بەرىلەدى. بۇل تولەم سوڭعى 2 جىلداعى الەۋمەتتىك اۋدارىمدار جۇرگىزىلگەن ورتاشا ايلىق تابىستىڭ 40%-ىنا تەڭ. ەگەر ەگىز نەمەسە ودان كوپ بالا تۋسا، تولەم ءار بالاعا جەكە ەسەپتەلەدى.
2025 جىلى اتالعان اي سايىنعى الەۋمەتتىك تولەم 239،6 مىڭ ادامعا تاعايىندالىپ، جالپى كولەمى 425،5 ملرد تەڭگەنى قۇرادى. جەلتوقساندا 16،4 مىڭ الۋشىعا بەرىلگەن تولەم سوماسى 33،1 ملرد تەڭگە بولعان. ورتاشا ايلىق تولەم مولشەرى 85 993 تەڭگەنى قۇرادى.