جاھاندىق كومپانيالاردىڭ 40%-ى ءوز جۇمىسىندا فريلانسەرلەر سانىن ارتتىرۋدى جوسپارلاپ وتىر.
بۇل تۋرالى ەڭبەك جانە حالىقتى الەۋمەتتىك قورعاۋ ءبىرىنشى ۆيسە-مينيسترى ءاقمادي سارباسوۆ ايتتى، دەپ حابارلايدى Almaty-akshamy.kz
ءاقمادي سارباسوۆ وزبەكستاندا ءوتىپ جاتقان «ورتالىق ازياداعى ەكونوميكالىق دامۋ ءۇشىن ءتيىمدى باسقارۋ» حالىقارالىق كونفەرەنسياسى بارىسىندا جۇمىسپەن قامتۋدىڭ ستاندارتتى ەمەس تۇرلەرىنىڭ كوبەيۋى بايقالعانىن اتاپ وتكەن.
ۆيسە-مينيستردىڭ مالىمەتىنشە، 10 جىل ىشىندە الەمدە سيفرلىق ەڭبەك پلاتفورمالارىنىڭ سانى 5 ەسە وسكەن. پلاتفورمالىق جۇمىسپەن قامتۋ كوپتەگەن ادام ءۇشىن اقشا تابۋدىڭ جانە كاسىبي دامۋدىڭ ناقتى ادىسىنە اينالۋدا.
«جاھاندىق كومپانيالاردىڭ 40%-ى ءوز جۇمىسىندا فريلانسەرلەر سانىن ارتتىرۋدى جوسپارلاپ وتىر. ال قازاقستاندا، ءبىزدىڭ باعالاۋىمىز بويىنشا، بۇگىندە 300 مىڭعا جۋىق فريلانسەر جۇمىس ىستەيدى»، - دەدى ا. سارباسوۆ.
سپيكەر ءبىرقاتار جاڭا ستراتەگيالىق باستامانى دا ۇسىندى. ول حالىقتىڭ تابىسىن 2025 جىلعا قاراي 27%-عا ارتتىرۋ جونىندەگى مىندەتتەردى شەشۋگە كومەكتەسۋى ءتيىس. جالپى باستامالار 4 باعىتتا ىسكە اسىرىلادى:
– وقىتۋ جانە قايتا دايارلاۋ ارقىلى جۇمىس كۇشىنىڭ ساپاسىن ارتتىرۋ؛
– زاڭنامالىق رەتتەۋ ارقىلى ەڭبەك نارىعىن ىرىقتاندىرۋ جانە جۇمىستىڭ يكەمدى تۇرلەرىمەن قامتىلعان قىزمەتكەرلەردى الەۋمەتتىك قورعاۋدى قامتاماسىز ەتۋ؛
– حالىققا كورسەتىلەتىن قىزمەتتەردىڭ ساپاسىن ارتتىرۋ ءۇشىن ەڭبەك نارىعىنىڭ ينفراقۇرىلىمىن دامىتۋ؛
– ەڭبەك نارىعىنىڭ سيفرلىق ەكوجۇيەسىن قۇرۋ ارقىلى قىزمەتتەردى اۋقىمدى سيفرلاندىرۋ.