قازاقستاندىق وقۋشىلار ال-فەرعاني اتىنداعى فيزيكا ءپانى بويىنشا ءبىرىنشى حالىقارالىق وليمپيادادا 11 مەدال جەڭىپ الدى، دەپ حابارلايدى almaty-akshamy.kz قازاقپاراتقا سىلتەمە جاساپ.
ۇلتتىق قۇرامانىڭ قورجىنىندا 2 التىن، 6 كۇمىس جانە 3 قولا مەدال بار. وليمپيادا وزبەكستاننىڭ فەرعانا قالاسىندا 8-13 قاراشا ارالىعىندا ۇيىمداستىرىلدى. زياتكەرلىك بايقاۋعا 18 ەلدەن، سونىڭ ىشىندە رەسەي، ءازىربايجان، بەلارۋس، رۋمىنيا جانە تاعى باسقا ەلدەردەن 130-عا جۋىق وقۋشى قاتىستى. ال-فەرعاني اتىنداعى فيزيكا ءپانى بويىنشا حالىقارالىق وليمپيادا ەكى كەزەڭدە ءوتتى. ءبىرىنشىسى كەزەڭدە — جازباشا جۇمىستار، ال ەكىنشىسىندە پراكتيكالىق جۇمىستار قارالدى. جەڭىمپازداردىڭ قاتارىندا، التىن مەدال — الىشەر ەركەبايەۆ، نۇرداۋلەت نازارباي، كۇمىس مەدال — دانييل شاتوحين، ورازحان حايدار، دىنمۇحاممەد ساپىبەك، ەرداۋلەت ناحىپ، بەرنار شامگونوۆ، دياس ەسپان، قولا مەدال يەگەرلەرى — بەكسۇلتان ءشارىپ، اسقار قاسىموۆ، نۇرجان حاسەنوۆ بار. وقۋشىلار وليمپياداداعى جەڭىسىن قازاقستان تاۋەلسىزدىگىنىڭ 30 جىلدىعىنا ارناپ وتىر.
«وليمپياداداعى باسەكەلەستىك وتە جوعارى بولدى، ويتكەنى قاتىسۋشىلاردىڭ باسىم بولىگى فيزيكا بويىنشا حالىقارالىق وليمپيادا (IPhO) رەيتينگىندە الدىڭعى قاتاردا. ءبىزدىڭ بالالار تاماشا ناتيجەلەر كورسەتىپ، قازاقستاندى الەمدىك ارەنادا لايىقتى كورسەتە ءبىلدى. ءقازىر ءبىلىم جانە عىلىم مينيسترلىگىنىڭ «دارىن» ورتالىعى وقۋشىلارىمىزدىڭ حالىقارالىق وليمپيادالارعا قاتىسۋىنا جاعداي جاساۋ ءۇشىن ءارتۇرلى دەڭگەيدەگى وليمپيادالاردى وتكىزۋ بويىنشا جۇمىس ىستەپ جاتىر»، — دەپ اتاپ ءوتتى ق ر ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتورايىمى گۇلميرا كارىموۆا.