سوت ونى 3،5 جىلعا باس بوستاندىعىنان ايىردى
قاراعاندى اۋداندىق سوتىندا پوليسەيلەردەن اقشا تالاپ ەتكەن 28 جاستاعى ەر ادام سوتتالدى. بۇل تۋرالى اۋداندىق سوتتىڭ باسپا ءسوز قىزمەتى ءمالىم ەتتى، دەپ حابارلايدى Almaty-akshamy.kz.
قىلمىستىق ءىس ماتەريالدارىندا ەر ادام ءوزىنىڭ سەرىكتەسىمەن بىرگە پوليسيا قىزمەتكەرلەرىن ۆيدەوعا ءتۇسىرىپ، ولاردىڭ ارەكەتتەرىنەن زاڭبۇزۋشىلىق تاپقىسى كەلگەنى جازىلعان. بىلتىر قازاندا ول قالا كوشەلەرىنىڭ بىرىندە باعدارشامنىڭ قىزىل سيگنالىنا توقتاماي، ءجۇرىپ كەتكەن پاترۋلدىك كولىكتى ءتۇسىرىپ العان ەدى.
تەرگەۋ مالىمەتتەرى بويىنشا، سوتتالۋشى پوليسيا ءپاترۋلىن ۇستاپ الىپ، ءوزىن بلوگەر رەتىندە تانىستىرىپ، قورقىتا باستاعان. ۇنسىزدىگى ءۇشىن ول 150 مىڭ تەڭگە سۇراعان. پارانى العاننان كەيىن ول سول كۇنى ۇستالدى. سوتتا 28 جاستاعى قاراعاندىلىق كىناسىن مويىندامادى. ول 2020 جىلدان باستاپ بلوگەر ەكەنىن جانە پوليسيا قىزمەتكەرلەرىنىڭ قۇقىق بۇزۋشىلىقتارىن تىركەۋ ءۇشىن ادەيى ءتۇسىرىلىم جۇرگىزگەنىن ايتتى.
"قازىبەك بي اۋداندىق سوتى ق ر قك 194-بابى 2-بولىگىنىڭ 2-تارماعى بويىنشا سوتتالۋشىلاردى كىنالى دەپ تانىدى. سوت بلوگەردى 3،5 جىلعا باس بوستاندىعىنان ايىردى. ونىڭ سەرىكتەسىنە 3،5 جىلعا باس بوستاندىعىن شەكتەۋ جازاسى تاعايىندالدى. سوت ۇكىمى زاڭدى كۇشىنە ەنگەن جوق"، - دەپ حابارلادى قاراعاندى وبلىسى قازىبەك بي اۋداندىق سوتىنىڭ باسپا ءسوز قىزمەتى.