قازاقستان رەسپۋبليكاسى ەنەرگەتيكا مينيسترلىگى 2026 جىلعى 13 قاڭتاردا قارا تەڭىز اكۆاتورياسىندا، كقك تەڭىز تەرمينالى ماڭىندا قازاقستاننىڭ ەكسپورتتىق مۇنايىن تاسىمالداۋعا قاتىسقان ەكى كەمەدە تىركەلگەن كەلەڭسىز وقيعالار تۋرالى اقپاراتتى رەسمي تۇردە راستايدى، - دەپ حابارلايدى Aqshamnews.kz.
مالتا تۋىمەن جۇرگەن «Matilda» تانكەرى «قازمۇنايگاز» ۇلتتىق كومپانياسىنىڭ قوسالقى ۇيىمى ارقىلى جالعا الىنعان جانە ۇۇا شابۋىلىنا ۇشىراعانى راستالدى. كەمەدە جارىلىس تىركەلگەنىمەن، ءورت شىقپاعان. ەكيپاج اراسىندا زارداپ شەككەندەر جوق. تەحنيكالىق قىزمەتتەردىڭ الدىن الا باعالاۋىنا سايكەس، تانكەر تەڭىزدە جۇزۋگە قابىلەتتى، كەمەنىڭ كورپۋسىندا اسا ءقاۋىپتى زاقىمدانۋلار انىقتالماعان.
ليبەريا تۋىمەن جۇرگەن «Delta Harmony» تانكەرى دە جۇكتەۋ جۇمىستارىنا دايىندىق كەزەڭىندە ۇشقىشسىز ۇشۋ اپپاراتى شابۋىلىنا ۇشىراعانى راستالدى. سالدارىنان ءورت شىعىپ، جەدەل سوندىرىلگەن. ەكيپاج مۇشەلەرى زارداپ شەككەن جوق. وپەراتيۆتىك شتاب دەرەكتەرىنە سايكەس، وقيعا كەزىندە كەمەگە مۇناي تيەۋ جۇمىستارى جۇرگىزىلمەگەن، جۇك سيستەرنالارى بوس بولعاندىقتان، قازاقستان رەسپۋبليكاسىنىڭ ەكسپورتتىق رەسۋرستارىنا زيان كەلتىرىلمەگەن.
ەنەرگەتيكا مينيسترلىگى لوگيستيكالىق تىزبەكتەردىڭ قاۋىپسىزدىگىن قامتاماسىز ەتۋ جانە ەكسپورتتىق جەتكىزىلىمدەردىڭ ۇزدىكسىز جۇمىسىن قامتاماسىز ەتۋ ماقساتىندا «قازمۇنايگاز» ۇلتتىق وپەراتورىمەن، كونسورسيۋم اكىمشىلىگىمەن جانە كەمەلەر يەلەرىمەن ءىس-قيمىلداردى جەدەل تۇردە ۇيلەستىرىپ وتىر.