پەتروپاۆل قالاسىندا حابارسىز كەتكەن 75 جاستاعى ايەل اۋرۋحانا اۋماعىنان اۋىر حالدە تابىلىپ، كەيىن جەدەل جاردەم كولىگىندە كوز جۇمدى، - دەپ حابارلايدى aqshamnews.kz ءتىلشىسى Azattyq Rýhy-نا سىلتەمە جاساپ.
زەينەتكەردىڭ جوعالعانى تۋرالى اقپاراتتى 14 قاڭتار كۇنى LIDER ۆولونتورلەر قوزعالىسى الەۋمەتتىك جەلىدە جاريالاعان. مالىمەتكە سايكەس، ايەل سول كۇنى تۇسكى ساعات 13:00 شاماسىندا ۇيىنەن اۋرۋحاناعا بەت الىپ، قايتا ورالماعان.
تۋىستارى كەشكە پوليسياعا ارىز ءتۇسىرىپ، ىزدەۋ جۇمىستارى باستالعان. اۋرۋحانا مارقۇمنىڭ ۇيىنەن بىرنەشە مينۋتتىق جەردە ورنالاسقانىنا قاراماستان، ونى سول ءتۇنى تابۋ مۇمكىن بولمادى. ۇيالى تەلەفونى ءوشىرۋلى بولعان. پوليسەيلەر ايەلدىڭ دەنساۋلىعىنا بايلانىستى باعىت-باعدارىن جوعالتۋى ىقتيمال ەكەنىن ايتىپتى.
Tengrinews.kz اقپارىنشا، سولتۇستىك قازاقستان وبلىستىق پوليسيا دەپارتامەنتى ىزدەۋ جۇمىستارىنا 60-تان استام ادام جۇمىلدىرىلعانىن حابارلاعان. الايدا، تۇنگى ۋاقىتتا زەينەتكەردى تابۋ مۇمكىن بولمادى.
«قالالىق پوليسيا، دەپارتامەنت قىزمەتكەرلەرى، سوبر جاۋىنگەرلەرى، ۇلتتىق ۇلان اسكەري قىزمەتشىلەرى جانە ۆولونتورلەر ىزدەۋگە قاتىستى. اۋا رايىنىڭ قولايسىزدىعى جۇمىستى قيىنداتتى. بارلىق ءابارۋى مۇمكىنا ورىندار تەكسەرىلىپ، بەينەباقىلاۋ جازبالارى قارالدى، الايدا تۇنگى ۋاقىتتا ايەلدىڭ قايدا ەكەنى انىقتالمادى»، – دەدى باسپا ءسوز حاتشىسى ادەماۋ مەڭدىبايەۆا.
15 قاڭتار كۇنى تاڭەرتەڭ زەينەتكەردى ۋچاسكەلىك ينسپەكتور اۋرۋحانا اۋماعىنداعى شارۋاشىلىق كورپۋس ماڭىنان، ادام سيرەك جۇرەتىن ايماقتان تاپقان.
«ايەل قاتتى توڭىپ، ءۇسىپ قالعان. سويلەسە المايتىن جاعدايدا بولدى. ونى بىردەن جەدەل جاردەم بريگاداسىنا تاپسىردىق، ءبىراق دارىگەرلەر ونىڭ ءومىرىن ساقتاپ قالا المادى»، – دەدى ۆەدومستۆو وكىلى.
قايعىلى جاعدايعا بايلانىستى قىلمىستىق ءىس قوزعالىپ، تەرگەۋ باستالدى.
ايتا كەتەيىك، ءقازىر پەتروپاۆل مەن سولتۇستىك قازاقستان وبلىسىندا ءۇشىنشى كۇن قاتارىنان قاتتى اياز ساقتالىپ وتىر. اۋا تەمپەراتۋراسى مينۋس 35-38 گرادۋسقا دەيىن تومەندەگەن. وسىعان بايلانىستى جولدار جابىلىپ، وقۋشىلار مەن ستۋدەنتتەر قاشىقتان وقۋعا كوشىرىلدى. بارلىق توتەنشە قىزمەتتەر كۇشەيتىلگەن رەجيمدە جۇمىس ىستەپ جاتىر.
پوليسيا تۇرعىندارعا ەگدە جاستاعى، دەنساۋلىعىندا كىناراتى بار تۋىستارىن باقىلاۋسىز سىرتقا شىعارماۋعا، ولاردىڭ قاۋىپسىزدىگىنە ەرەكشە ءمان بەرۋگە شاقىرادى.