رەسپۋبليكا كۇنىنە وراي نۇرعيسا تىلەندييەۆ اتىنداعى مەموريالدىق مۇراجايدا «ءوز ەلىم» اتتى مەرەكەلىك ءىس شارا وتكىزىلدى. كونسەرتتىڭ نەگىزگى ماقساتى - تۇرعىندار اراسىندا پاتريوتتىق سەزىمدى ارتتىرۋ. شارا بارىسىندا ونەرپازدار كومپوزيتور، حالىق قاھارمانى ن.تىلەندييەۆتىڭ تۋىندىلارىن ورىنداپ، كورەرمەننىڭ كوڭىلىنەن شىقتى.
– بۇگىنگى ءىس شارانىڭ نەگىزگى ماقساتى - رەسپۋبليكا كۇنىن ۇلكەن دەڭگەيدە اتاپ ءوتۋ، ن.تىلەندييەۆتىڭ مەموريالدىق مۋزەيىنىڭ بار ەكەنىن كورسەتۋ، كومپوزيتوردىڭ شىعارمالارىن تانىتۋ. بۇگىنگى كونسەرتتە قۇرمانعازى اتىنداعى كونسەرۆوتوريانىڭ ستۋدەنتتەرى ونەر كورسەتتى. نۇرعيسا تىلەندييەۆتىڭ «قۇستار ءانى»، «تۋعان ەل» ت.ب اندەرى شىرقالدى. بۇل مەموريالدىق مۋزەي 2014 جىلى اشىلدى. كەز كەلگەن ادام كەلىپ كورە الادى. وقۋشىلارعا كىرۋ تەگىن، – دەدى ن. تىلەندييەۆ اتىنداعى مەموريالدىق مۋزەيىنىڭ ەكسكۋرسوۆودى ءمولدىر زىكىرباي.
ايگىلى كومپوزيتور نۇرعيسا تىلەندييەۆتىڭ تۋىندىلارىن حالىق ءسۇيىپ تىڭدايدى. ونىڭ شىعارماشىلىعىن باعالايتىن جانە ناسيحاتتايتىن ادام جەتەرلىك. سولاردىڭ ءبىرى اباي اتىنداعى قازاق ۇلتتىق وپەرا جانە بالەت تەاترىنىڭ ستاجەر ءسوليستى شىڭعىس نۇرعالي ۇلى. ول ۇلى تۇلعانىڭ اندەرىنە دەگەن ماحابباتى بولەك ەكەنىن ايتا كەتتى.
– نۇرعيسا تىلەندييەۆ اتامىز ءاربىرىمىزدىڭ جۇرەگىمىزدە دەپ ويلايمىن. وسىنداي كەرەمەت مەرەكەدە وسى مۇراجايعا كەلىپ، ول كىسىنىڭ زاتتارىن كورىپ شابىتتاندىم. وتە اسەرلى ءسات دەۋگە بولادى. بۇنداي ۇلى تۇلعالاردىڭ ەسىمى ەشقاشان وشپەيدى دەگەن سەنىمدەمىن. ءاربىر ءانىنىڭ وزىندىك ءمان ماعىناسى بار، – دەدى ول.
ەلگە دەگەن قۇرمەت پەن سۇيىسپەنشىلىكتى دارىپتەگەن بۇل كونسەرت كورەرمەندەرگە رۋحاني ازىق سىيلاپ، ونەر مەن ءپاتريوتيزمنىڭ ماڭىزدىلىعىن ۇمىتپاۋعا شاقىردى.