ۇبت وتكىزۋ قاعيدالارىنا وزگەرىستەر ەنگىزىلدى

ەلەكتروندىق فورماتتاعى ۇبت وتكىزۋ مەرزىمدەرى بەلگىلەندى، دەپ حابارلايدى aqshamnews.kz

عىلىم جانە جوعارى ءبىلىم ءمينيسترىنىڭ م. ا. 2025 جىلعى 3 شىلدەدەگى بۇيرىعىمەن ۇلتتىق ءبىرىڭعاي تەستىلەۋدى وتكىزۋ قاعيدالارىنا وزگەرىستەر ەنگىزىلدى.

ۇلتتىق ءبىرىڭعاي تەستىلەۋگە (ۇبت) قاتىسۋعا ءوتىنىش بەرگەن، ءبىراق تەستىلەۋگە قاتىسپاعان، سونداي-اق ءوتىنىش بەرۋ كەزەڭىندە ۇبت-عا قاتىسۋعا ءوتىنىش بەرمەگەن تالاپكەرلەرگە تەستىلەۋ كۇندەرى اۋديتوريادا بوس ورىن بولعان جاعدايدا (قاعاز فورماتتاعى تەستىلەۋ ءۇشىن ءتيىستى تەستىلەۋ تىلىندە) كەلەسى نەگىزدى سەبەپتەر بويىنشا ۇبت-عا قايتا تىركەلىپ، ءبىر كۇندە قاتىسۋ مۇمكىندىگى بەرىلەدى:

دەنساۋلىق جاعدايى بويىنشا №026/ۋ نىسانىنا سايكەس دارىگەرلىك-كونسۋلتاسيالىق كوميسسيانىڭ قورىتىندىسى نەمەسە امبۋلاتوريالىق كارتانىڭ نە اۋرۋ تاريحىنىڭ كوشىرمەسى بولعان جاعدايدا، ول تەستىلەۋ كۇنىمەن سايكەس كەلۋى ءتيىس؛
جاقىن تۋىستارىنىڭ قايتىس بولۋىن راستايتىن قۇجاتتار بولعان جاعدايدا؛
جالپى ءبىلىم بەرەتىن پاندەر بويىنشا رەسپۋبليكالىق جانە حالىقارالىق وليمپيادالارعا، عىلىمي جوبالار (عىلىمي جارىستار) بايقاۋلارىنا، ورىنداۋشىلار بايقاۋلارىنا، كاسىپتىك شەبەرلىك كونكۋرستارىنا جانە سپورتتىق جارىستارعا قاتىسقان جاعدايدا؛
توتەنشە جاعدايلار بولعان جاعدايدا.
قاعاز فورماتىنداعى ۇبت-دا تالاپكەر ءتيىستى قۇجاتتاردى قوسا بەرە وتىرىپ، مەملەكەتتىك كوميسسيا ءتوراعاسىنىڭ اتىنا قايتا تەستىلەۋگە ءوتىنىش بەرەدى.

ەلەكتروندىق فورماتتاعى ۇبت-دا تالاپكەر ۇلتتىق تەستىلەۋ ورتالىعى ديرەكتورىنىڭ اتىنا ءوتىنىش بەرەدى.

سونىمەن قاتار، ەلەكتروندىق فورماتتاعى ۇبت مىناداي مەرزىمدەردە وتكىزىلەدى:

1) 10 قاڭتار – 10 اقپان ارالىعىندا:

جالپى ورتا ءبىلىم بەرۋ ۇيىمدارىنىڭ 11 (12) سىنىپ بىتىرۋشىلەرى – ءوز قالاۋى بويىنشا جوعارى وقۋ ورىندارىنا (جوو) اقىلى نەگىزدە قابىلدانۋ ءۇشىن؛
الدىڭعى جىلدارداعى مەكتەپ تۇلەكتەرى، تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى – رەسپۋبليكالىق نەمەسە جەرگىلىكتى بيۋدجەت قاراجاتىنان ءبىلىم بەرۋ گرانتىن تاعايىنداۋ كونكۋرسىنا قاتىسۋ نەمەسە اقىلى نەگىزدە جوو-عا قابىلدانۋ ءۇشىن؛
شەتەلدە وقىعان مەكتەپ تۇلەكتەرى، سونداي-اق شەتەلدە ءبىلىم العان، قازاقستان رەسپۋبليكاسىنىڭ ازاماتتارى بولىپ تابىلمايتىن قازاق ۇلتىنىڭ وكىلدەرى – جوعارىداعى ماقساتتار ءۇشىن؛
كۇندىزگى بولىمدە اقىلى نەگىزدە وقۋعا قابىلدانعان، ءبىراق ۇبت ناتيجەسى بويىنشا شەكتى بالل جيناماعان، بەيىندىك پاندەر كومبيناسياسى سايكەس كەلمەيتىن نەمەسە ۇبت ناتيجەلەرى جويىلعان تالاپكەرلەر – سول جىلى قايتادان اقىلى نەگىزدە جوو-عا قابىلدانۋ ءۇشىن؛
شىعارماشىلىق دايارلىقتى تالاپ ەتەتىن ءبىلىم بەرۋ باعدارلامالارى بويىنشا وقيتىن جانە باسقا ءبىلىم بەرۋ باعدارلامالارىنا اۋىسقىسى كەلەتىن ستۋدەنتتەر – اقىلى نەگىزدە؛
پەداگوگيكالىق عىلىمدار سالاسىنا اۋىسقىسى كەلەتىن ستۋدەنتتەر – اقىلى نەگىزدە.

2) 1 ناۋرىز – 6 ءساۋىر ارالىعىندا:

جوعارىدا كورسەتىلگەن تۇلعالار ءۇشىن، سونداي-اق جوعارى وقۋ ورىندارىنا اقىلى نەمەسە گرانت نەگىزىندە ءتۇسۋ ماقساتىندا.

3) 10 مامىر – 10 شىلدە ارالىعىندا:

وسى جىلعى مەكتەپ بىتىرۋشىلەر – گرانت كونكۋرسىنا قاتىسۋ، جوو-عا اقىلى نەگىزدە قابىلدانۋ نەمەسە مەملەكەتتىك تاپسىرىس بويىنشا وقۋ ءۇشىن؛
الدىڭعى جىلدارداعى مەكتەپ تۇلەكتەرى، تەحنيكالىق جانە كاسىپتىك نەمەسە ورتا بىلىمنەن كەيىنگى ءبىلىم بەرۋ ۇيىمدارىنىڭ تۇلەكتەرى – جوعارىداعى ماقساتتار ءۇشىن؛
قىسقارتىلعان وقۋ مەرزىمدەرىن كوزدەيتىن جوعارى ءبىلىم بەرۋ باعدارلامالارى بويىنشا تۇسەتىن كوللەدج تۇلەكتەرى – گرانت كونكۋرسىنا قاتىسۋ ءۇشىن؛
شەتەلدە وقىعان مەكتەپ تۇلەكتەرى جانە شەتەلدە ءبىلىم العان قازاق ۇلتىنىڭ وكىلدەرى – جوعارىداعى ماقساتتار ءۇشىن؛
اقىلى بولىمدە كۇندىزگى وقۋ نىسانىندا وقۋعا قابىلدانعان، ءبىراق شەكتى بالل جيناماعان، بەيىندىك پاندەر كومبيناسياسى سايكەس كەلمەيتىن نەمەسە ۇبت ناتيجەلەرى جويىلعان تالاپكەرلەر – سول جىلى قايتادان اقىلى نەگىزدە جوو-عا قابىلدانۋ ءۇشىن.
بۇل مەرزىمدە ۇبت تاپسىرعان تۇلعالار ءۇشىن بەيىندىك پاندەردى وزگەرتۋگە جول بەرىلمەيدى.
4) 10 – 20 تامىز ارالىعىندا:

وسى جىلعى مەكتەپ بىتىرۋشىلەر مەن الدىڭعى جىلدارداعى مەكتەپ نەمەسە كوللەدج تۇلەكتەرى – جوعارىداعى ماقساتتار ءۇشىن؛
شىعارماشىلىق دايارلىقتى تالاپ ەتەتىن ءبىلىم بەرۋ باعدارلامالارىنان باسقا باعدارلامالارعا اۋىسقىسى كەلەتىن ستۋدەنتتەر – اقىلى نەگىزدە؛
پەداگوگيكالىق باعىتتارعا اۋىسقىسى كەلەتىن ستۋدەنتتەر – اقىلى نەگىزدە.
سونىمەن قاتار، ەگەر حالىقارالىق نەمەسە شەتەلدىك وقۋ ورىندارى (نەمەسە ولاردىڭ فيليالدارى) Quacquarelli Symonds، Academic Ranking of World Universities، Times Higher Education حالىقارالىق اكادەميالىق رەيتينگتەرىنىڭ توپ-250-نا جانە/نەمەسە ەكونوميكالىق ىنتىماقتاستىق جانە دامۋ ۇيىمى (ەىدۇ) مەن بريكس ەلدەرىنىڭ ۇلتتىق رەيتينگتەرىنىڭ توپ-100-نا كىرسە، وندا 1 جانە 2-تارماقتاردا كورسەتىلگەن مەرزىمدەردە وتكىزىلگەن ۇبت ناتيجەلەرى رەسپۋبليكالىق بيۋدجەت ەسەبىنەن ءبىلىم بەرۋ گرانتىن تاعايىنداۋ كونكۋرسىنا قاتىسۋ ءۇشىن جارامدى بولىپ تابىلادى.

بۇيرىق 2025 جىلعى 3 شىلدەدەن باستاپ كۇشىنە ەنەدى جانە 2025 جىلعى 1 شىلدەدەن باستاپ تۋىنداعان قۇقىقتىق قاتىناستارعا قولدانىلادى.