اۋەزوۆ اۋداندىق اكىمدىگى مەن وڭىرلىك كوممۋنيكاسيالار قىزمەتى ۇيىمداستىرعان پرەسس-تۋر بارىسىندا جۋرناليستەر ن. ساس اتىنداعى ورىس مەملەكەتتىك اكادەميالىق بالالار مەن جاسوسپىرىمدەر تەاترىن قايتا جاڭعىرتۋ جۇمىسىمەن تانىستى. تەاتردىڭ كىرەبەرىسىنە ءمارماردان جاسالعان پاننو قويۋ – دىنمۇحامەد قونايەۆتىڭ يدەياسى.
جوبانىڭ جەتەكشىسى اسقار ساعىندىقوۆتىڭ ايتۋىنشا، جۇمىس كەزىندە تاريحي عيماراتتىڭ ماڭىزدىلىعى ەسكەرىپتى. تاريحي ارحيتەكتۋرالىق ەلەمەنتتەر، ونىڭ ىشىندە موزايكامەن جاسالعان بارەلەف، باسپالداقتار مەن قاناتتار، چەحوسلوۆاك ليۋسترالارى قالپىنا كەلتىرىلمەك. بۇل ليۋسترالار بولشەكتەلىپ، قايتا قالپىنا كەلتىرۋ ءۇشىن جوندەۋگە جىبەرىلگەن.
«جوبانى ازىرلەپ جاتقاندا قونايەۆ جاساعان جوبانى تاۋىپ الدىق، وندا كىرەبەرىسىنە ءمارمار پاننو ورناتۋدى جوسپارلاپتى. ءبىراق 15 جىل بويى ونى ىسكە اسىرا الماعان. ءبىز وسى كونسەپسيانى قالپىنا كەلتىرىپ، تولىق جۇزەگە اسىرعالى وتىرمىز»، - دەپ اتاپ ءوتتى ول.
تەاتر عيماراتى 1979-1980 جىلدارى الماتىنىڭ ماقتا-توقىما كومبيناتىنىڭ مادەنيەت ءۇيى رەتىندە سالىنىپ، ونى ارحيتەكتورلار البينا پەتروۆا، گۇلزارا دجاكيپوۆا مەن زاۋرەش مۇستافينا جوبالاعان.
«عيماراتتىڭ قاسبەتىنىڭ جاعدايى وتە ناشار. تەاتر جۇمىس ىستەگەن كەزدە دە تاستارى وزىنەن ءوزى ۇگىتىلىپ ءتۇسىپ كەتەتىن. بۇرىن ونى ادامدارعا زاقىم كەلتىرمەس ءۇشىن بولتپەن بەكىتىپ قويعان»، - دەدى اسقار ساعىندىقوۆ.
جاڭارتۋدان كەيىن تەاتردىڭ سىرتقى كەلبەتى دە، ىشكى جاعى دا ايتارلىقتاي وزگەرەدى. جەرتولە مەن تەحنيكالىق قابات كەڭەيەتىندىكتەن، عيماراتتىڭ جالپى اۋدانى 9 800 م²-دەن 14 680 م²-گە دەيىن ۇلعايتىلادى. ءبىراق كورەرمەننىڭ ورىن سانى 781-دەن 744-كە دەيىن قىسقارادى، سەبەبى جايلى ورىندىق ورناتىپ، قاتاردىڭ اراسىنداعى جولدى ەداۋىر كەڭەيتكەن.
تەاتر تولىق تەحنيكالىق قايتا جابدىقتاۋدان وتەدى. بەس كوتەرگىش الاڭ، شىعارىلاتىن جانە اينالمالى مەحانيزمدەر، جاڭا مۋلتيمەديالىق جۇيە، سونداي-اق ينتەللەكتۋالدى جارىق پەن ساحنانى باسقارۋ جۇيەسى ورناتىلادى. سونىمەن قاتار، ءتيىمدى جارىقتاندىرۋ جۇيەسى ەنگىزىلىپ، ءبىر ورتالىقتان باسقارىلاتىن بولادى ەندى.
تەاتر اۋماعىندا جاڭا Black Box فورماتىنا ساي كىشى ساحنا عيماراتى دا سالىنىپ جاتىر. عيماراتتىڭ جالپى اۋدانى 10 500 م²، 220 ورىندىق بولادى. بۇل كەڭىستىك ءتۇرلى فورماتتاعى سپەكتاكلدەرگە بەيىمدەلىپ، تۇرلەنىپ وتىرادى. كىشى ساحنا نەگىزگى عيماراتپەن جابىق وتكەل ارقىلى بايلانىسادى، بۇل تاريحي بولىكتى جاڭارعان كەڭىستىكپەن بىرىكتىرەدى.
جوبا الماتى قالاسىنىڭ قۇرىلىس باسقارماسى مەن مەردىگەر ۇيىم «BI Urban Construction» ج ش س بىرلەسىپ جۇزەگە اسىرىپ جاتىر. جوبانىڭ جالپى قۇنى 23،9 ميلليارد تەڭگە، جاڭا عيماراتتىڭ الاڭى 10 559 م² قۇرايدى. ءقازىر جۇمىستار 56%-عا، جاڭا ساحناعا ارنالعان جەردەگى جۇمىس 65%-عا اياقتالدى. سونىمەن قاتار، قورشاعان اۋماقتى اباتتاندىرۋ جۇمىستارى دا قاراستىرىلعان. بارلىق قۇرىلىس جانە ىسكە قوسۋ جۇمىستارىن 2026 جىلدىڭ شىلدە ايىندا اياقتاۋ جوسپارلانىپ وتىر.