19 اقپاندا قاسيەتتى رامازان ايى باستالادى. وسى كۇنى مۇسىلماندار ورازا ۇستاۋعا كىرىسىپ، ول 20 ناۋرىزعا دەيىن جالعاسىپ، ورازا ايت مەرەكەسىمەن ءتامامدالادى. يمان كەلتىرگەن جاندار ءۇشىن بۇل كەزەڭ تاماقتانۋ ءتارتىبىنىڭ وزگەرۋى عانا ەمەس، ىشكى تارتىپكە كەلۋ، ءومىردىڭ ۇيرەنشىكتى ىرعاعىن قايتا باعالاۋ جانە كۇندەلىكتى كۇيبەڭدە كەيىنگە ىسىرىلا بەرەتىن رۋحاني قۇندىلىقتارعا قايتا ورالۋ ۋاقىتى.
رامازان توقتاۋ ايى. بۇل ءتاننىڭ ەمەس، ەڭ الدىمەن وي مەن نيەتتىڭ توقتاۋى. ادام وسى كەزەڭدە كۇندەلىكتى ادەتتىڭ اۆتوماتيزمىنەن شىعىپ، وزىنە مۇقيات ۇڭىلە باستايدى: سوزدەرىنە، ىس-ارەكەتىنە، نيەتىنە، جۇرەگىن نە نارسە قوزعاپ تۇرعانىنا نازار اۋدارادى.
سوندىقتاندا رامازاندا ادامگەرشىلىك مىنەز-قۇلىقتىڭ ءمانى ايرىقشا ارتادى. ورازا - تاڭنان كەشكە دەيىن ىشىپ-جەۋدەن تىيىلۋ عانا ەمەس. بۇل وز-وزىڭمەن جۇمىس، يماندى كۇشەيتۋ، سابىر مەن ءوزىن-وزى باقىلاۋدى دامىتۋ، دورەكىلىكتەن، وتىرىكتەن، وسەك پەن بوس سوزدەن اۋلاق بولۋ. ماڭىزدىسى - ادامنىڭ نە جەمەگەنى ەمەس، نە ايتپاعانى، نە ويلاماعانى، جۇرەگىنە نەنى جولاتپاعانى.
بۇل ايدا ارتىق تۇتىنۋ تۋرالى دا ويلانۋ ورىندى - تەك تاعامدى ەمەس، ەموسيانى، اقپاراتتى، كورسەتپەلى مەنمەندىكتى دە شەكتەۋ قاجەت. رامازان ءوزىنىڭ ءمانى جاعىنان ىشكى تىنىشتىق، جيناقىلىق پەن ولشەم ايى. ول ادامدى قاجەتتىدەن ارتىق الماۋعا، بارعا شۇكىر ەتۋگە ۇيرەتەدى.
قازاقستاندىق وتباسىلار ءۇشىن رامازان ءداستۇرلى تۇردە الەۋمەتتىك بايلانىستاردى نىعايتاتىن كەزەڭگە اينالادى. بىرگە اۋىزاشار جاساۋ، جاقىندارعا كوڭىل ءبولۋ، دوستاردى، كورشىلەردى، ارىپتەستەردى ۇيگە شاقىرۋ - ورازا ۇستاماسا دا، ادامعا دەگەن قۇرمەتتىڭ كورىنىسى. اۋىزاشاردىڭ قۇندىلىعى داستارحاننىڭ مولدىعىندا نەمەسە جۇمسالعان قارجىدا ەمەس، ورتاق اس پەن قاسيەتتى ايدىڭ بەرەكەسىن بولىسە الۋىندا.
وكىنىشكە قاراي، كەيدە ءبىز وسى ماعىنانى جوعالتىپ الامىز. الەۋمەتتىك جەلىلەردە جىل سايىن اۋىزاشار داستارحاندارىنىڭ سان-سالتاناتىمەن جارىسقان بەينەلەر كوبەيىپ كەلەدى. اۋىزاشاردى جارىسقا، ءتىپتى باسەكەگە اينالدىرۋ - ونىڭ رۋحىنا قايشى. ءبىر جاعىنان، مول قاراجات جۇمساپ، ەكىنشى جاعىنان تۇرمىسىنا شاعىمداناتىن جانداردى كورۋ دە ويلاندىرادى.
نەگىزىندە اۋىزاشار - توي ەمەس. ول - تىنىش ءارى تەرەڭ ءمانى بار ءراسىم. مۇندا قاراپايىمدىلىق، شىنايىلىق جانە دۇعا مەن ويعا كوبىرەك ۋاقىت ءبولۋ ماڭىزدى. كورسەتپەلى مولشىلىق ورازانىڭ نەگىزگى يدەياسىنا - سابىر مەن شەكتەۋگە - قايشى كەلەدى.
رامازان سىرتقى ارەكەتتەر ايى ەمەس، ىشكى وزگەرىس ايى. ونىڭ باستى ءمانى دە وسىندا: وسى اي اياقتالعان سوڭ ادام از دا بولسا وزگەرىپ، سابىرلىراق، ادامدارعا مۇقيات، وز-وزىنە ادالىراق بولىپ شىقسا - ورازانىڭ جەمىسى سول. ال ەگەر ونداي وزگەرىس بولماسا، وندا ەڭ ماڭىزدى نارسە نازاردان تىس قالعانى.