جەڭىمپازدارعا كادەسىيلار جانە تەاترعا بيلەتتەر بەرىلدى
«Alatay aqparat» مەدياحولدينگىنىڭ ۇيىمداستىرۋىمەن وتكەن «مەنىڭ انام!» تاقىرىبىنداعى سۋرەت بايقاۋىنىڭ جەڭىمپازدارى ماراپاتتالدى، دەپ حابارلايدى Almaty-akshamy.kz.
كىشكەنتاي قىلقالام شەبەرلەرى مەن ونەرپازداردى قۇتتىقتاۋ راسىمىنە مەدياحولدينگ باسشىلىعى، بايقاۋعا سەرىكتەستىك تانىتقان تەاترلاردىڭ وكىلدەرى جانە جەڭىمپازدار مەن ولاردىڭ اتا-انالارى قاتىستى. ايتا كەتسەك، بايقاۋعا تەك قانا وقۋشىلار ەمەس بالاباقشا تاربيەلەنۋشىلەرى دە قاتىسقان بولاتىن. قاتىسۋشىلار اراسىندا الماتى قالاسىنىڭ بالدىرعان ونەرپازدارىنان بولەك، ەلوردانىڭ كىشكەنتاي تۇرعىندارى دا بار.
ونەرپازداردى ماراپاتتاۋ بارىسىندا «Alatay aqparat» مەدياحولدينگى باس ديرەكتورىنىڭ ورىنباسارى داۋرەن دۇيسەبايەۆ بارلىق قاتىسۋشىلارعا، اتا-انالارعا بالالاردى قاناتتاندىرىپ، يگى شارالارعا قاتىستىرۋعا اتسالىسقاندارى ءۇشىن العىسىن جەتكىزدى.
«انا تاقىرىبىندا كىشكەنتاي ونەرپازدارىمىز وتە جاقسى سۋرەتتەر سالىپ، ۆيدەولار ءتۇسىردى. انا ءبارىمىز ءۇشىن قاشاندا بيىك تۇلعا، ۇلى ەسىم. ءبىز انالارىمىزدى، ارۋلارىمىزدى، قىزدارىمىزدى قاشاندا قۇرمەتتەيمىز. اياۋلى تاقىرىپقا ارنالعان بايقاۋدا قاتىسۋشىلارىمىز وزدەرىنىڭ ونەرلەرىمەن ءبولىستى. سابيلىك سەزىمدەرىن سۋرەتپەن جەتكىزدى. بۇل بايقاۋدىڭ ورنى ەرەكشە دەپ بىلەمىن. الدا ءالى بايقاۋلار بولادى. ونەرلەرىڭىز ورگە ءجۇزسىن»، - دەدى داۋرەن دۇيسەبايەۆ.
ال مەدياحولدينگتىڭ كوممەرسيالىق ديرەكتورى قۋانىش ديۋسكالييەۆ بالدىرعاندارىمىزدىڭ ونەرلەرىنە ساتتىلىك تىلەپ، بايقاۋلاردا جۇلدەگە يە بولا بەرسىن دەگەن تىلەگىن ارنادى جانە ءارقاشان ونەرپاز بالالاردى قولداپ، ولارعا دەمەۋ بولۋدى جالعاستىرا بەرۋدى جەتكىزدى.
سۋرەت سالىپ، ءوز ونەرلەرىمەن بولىسكەن دارىندى بالدىرعانداردى ماراپاتتاۋ راسىمىنە ارنايى كەلگەن، وسى باقاۋعا سەرىكتەستىك بىلدىرگەن مەملەكەتتىك قۋىرشاق تەاترىنىڭ وكىلى بەيبىت الكەيەۆا: «بالا بويىنداعى تالانتتى اشىپ، ىشتەگى تۇنىپ تۇرعان شەبەرلىكتىڭ قانات قاعۋىنا مۇمكىندىك بەرىپ، بالانى جاقسىعا بەيىمدەۋ بۇل – اتا-انانىڭ ۇلكەن ەڭبەگى. بالانىڭ جاستايىنان ونەرگە قۇمار بولۋى بولاشاقتا ۇلكەن بەلەستەرگە جەتەلەيدى. بۇگىن وسى سۋرەت بايقاۋىنا قاتىسقان ءاربىر بالا تالانتتى ءارى ونەرلى. بولاشاقتا ۇلكەن بەلەستەردى باعىندىرا بەرسىن. مادەني وشاق - تەاترلارعا كەلىپ كوكجيەكتەرىن دامىتىپ، كوزقاراستارىن كەڭەيتسىن. ءبىز جەڭىمپازدارعا قويىلىمدار كورۋگە ارنايى شاقىرتۋلار ۇسىنىپ كەلىپ وتىرمىز»، - دەگەن جۇرەكجاردى تىلەگىن ارنادى.
«مەنىڭ انام!» سۋرەت بايقاۋىندا ۇزدىك دەپ تانىلعان سەگىز جەڭىمپازعا «Alatay aqparat» مەدياحولدينگىنىڭ اتىنان ەستەلىككە كادەسىي ونىمدەرى تابىستالىپ، بايقاۋعا سەرىكتەستىك تانىتقان مەملەكەتتىك قۋىرشاق تەاترى مەن ن.ساس اتىنداعى مەملەكەتتىك اكادەميالىق بالالار مەن جاسوسپىرىمدەر تەاترىنىڭ قويىلىمدارىنا بيلەتتەر بەرىلدى.
بالالارعا رياسىز قۋانىش سىيلاعان بايقاۋعا تەك جەڭىمپازدار عانا ەمەس، اتا-انالار دا العىستارىن جەتكىزدى.
جەڭىمپازداردىڭ اتا-انالارى اتىنان ءسوز العان اقبوتا جەڭىس قىزى: «الىپ شاھاردىڭ تىنىس-تىرلىشىلىگنەن اقپارات تاراتىپ وتىرعان «Almaty aqshamy» گازەتىنىڭ رەداكسياسىندا باس قوسىپ، بالالارىمىزدى ماراپاتتاپ قۋانتىپ جاتىرسىزدار. بۇل گازەتتى ءبىز ءوزىمىز دە ۇزبەي وقيتىن وقىرمانداردىڭ ءبىرىمىز. بۇنىڭ ءوزى بالالارعا ۇلكەن ۇلگى، تاربيە. بيىلعى بالالار جىلىندا بالدىرعاندارىمىزعا قۋانىش سىيلاپ، كىشكەنتاي ونەرپازدارىمىزدىڭ تامشىداي عانا ونەرىن، تاۋداي باعالاپ جاتقان ۇيىمداستىرۋشىلارعا، «Alatay aqparat» مەدياحولدينگىنە العىس ايتقىمىز كەلەدى»، - دەگەن ويىن جەتكىزدى.
ماراپاتتا جەڭىمپازدار ارنايى ەستەلىك سۋرەتتەرگە ءتۇسىپ، الدا وتكىزىلەتىن وزگە دە بايقاۋلاردى اسىعا كۇتەتىندەرىن ءارى قاتىسۋعا دايىن ەكەندىكتەرىن ايتىپ جاتتى.
بۇعان دەيىن ايتقانىمىزداي، بايقاۋ مەدياحولدينگتىڭ ينستاگرامداعى @aqshamy.official رەسمي پاراقشاسىندا ءوتتى. بايقاۋدىڭ شارتى بويىنشا بالالار «مەنىڭ انام!» تاقىرىبى اياسىندا اناسىنىڭ سۋرەتىن سالىپ، ۆيدەو ءتۇسىردى.
وسى سايىسقا اتسالىسىپ، ءوز جۇمىستارىن جولداعان ءبىزدىڭ جاس سۋرەتشىلەرىمىزگە العىس ايتامىز.
