قازاقستان پرەزيدەنتى رەسەي ۇكىمەتىنىڭ ءتوراعاسى ميحايل ميشۋستينمەن كەزدەستى
مەملەكەت باسشىسى قازاقستان مەن رەسەي ۇكىمەت باسشىلارىنىڭ وتكىزگەن كەلىسسوزدەرىنىڭ قورىتىندىسىن جوعارى باعالادى، دەپ حابارلايدى Almaty-akshamy.kz. اkorda.kz سايتىنا سىلتەمە جاساپ.
«كەشە سىزدەر وتە مازمۇندى، تابىستى كەلىسسوزدەر جۇرگىزدىڭىزدەر. ەكى مەملەكەتتىڭ ساۋدا-ەكونوميكا سالاسىنداعى ءوزارا ءىس-قيمىلدىڭ قارقىندى دامىعانىن اتاپ وتكىم كەلەدى. ىنتىماقتاستىقتى ودان ءارى قارقىندى دامىتۋعا مۇمكىندىك بەرەتىن ماڭىزدى كەلىسىمدەرگە قول قويۋعا دايىندىق ءجۇرىپ جاتىر. پاندەمياعا بايلانىستى تۋىنداپ وتىرعان بارلىق قيىندىقتارعا قاراماستان، ەكى ەل اراسىنداعى ساۋدا وتكەن 5 ايدىڭ ىشىندە 26 پايىزعا ارتتى»، – دەدى قاسىم-جومارت توقايەۆ.
رەسەي پرەمەر-مينيسترى ميحايل ميشۋستين قاسىم-جومارت توقايەۆقا قوناقجايلىعى ءۇشىن العىس ءبىلدىرىپ، پرەزيدەنت ۆلاديمير ءپۋتيننىڭ سالەمىن جەتكىزدى.
«ءبىز باۋىرلاس قازاقستانمەن اراداعى دوستىق، ارىپتەستىك جانە وداقتاستىق قاتىناستارىمىزدى جوعارى باعالايمىز. ۇكىمەتتەرىمىز اراسىنداعى بايلانىستاردىڭ مازمۇنى تەرەڭ. بىرلەسىپ جۇمىس جاساۋعا زور مۇمكىندىكتەر بار. ساۋدا-ەكونوميكالىق ىنتىماقتاستىعىمىز جاقسى دامىپ كەلەدى. وسى جىلدىڭ ءبىرىنشى جارتىجىلدىعىندا ءوزارا تاۋار اينالىمى ءۇش ەسەگە ارتتى. جىلدىڭ سوڭىنا دەيىن ساۋدا اينالىمىنان وتە جوعارى كورسەتكىشتەر كۇتەمىز جانە وعان بارلىق مۇمكىندىكتەر بار. ينۆەستيسيالىق باعىتتا دا ءوزارا تابىستى جۇمىس ىستەپ جاتىرمىز. رەسەي بيزنەسى قازاقستاننىڭ 32 ءىرى جوباسىنا قاتىسۋدا. قازاقستاندىق ارىپتەستەرىمىز دە رەسەيدىڭ جوبالارىنا بەلسەندى اتسالىسىپ جاتىر»، – دەدى ميحايل ميشۋستين.
اڭگىمەلەسۋ بارىسىندا قازاقستان مەن رەسەيدىڭ پاندەمياعا قارسى كۇرەس جانە بىرلەسىپ ۆاكسينا شىعارۋ سياقتى ءوزارا ءىس-قيمىلداعى باسىم باعىتتار تۋرالى ءسوز بولدى.
تاراپتار ايماقتار اراسىنداعى بايلانىستاردىڭ وڭ قارقىنى تۋرالى دا پىكىر الماستى. بۇل قاتىناستارعا وسى كۇزدە كوكشەتاۋ قالاسىندا مەملەكەت باسشىلارىنىڭ قاتىسۋىمەن وتەتىن كەزەكتى ايماقارالىق ىنتىماقتاستىق فورۋمى تىڭ سەرپىن بەرەدى.