كونستيتۋسيالىق كوميسسيانىڭ كەزەكتى وتىرىسى باستالدى، - دەپ حابارلايدى aqshamnews.kz ءتىلشىسى.
كونستيتۋسيالىق سوت ءتوراعاسىنىڭ ورىنباسارى باقىت نۇرمۇحانوۆ كونستيتۋسيالىق رەفورما كوميسسياسىنىڭ مۇشەلەرىنە اتا زاڭعا ەنگىزىلەتىن وزگەرىستەردىڭ جيىنتىق جوباسىن تانىستىردى.
بۇل قۇجات ازاماتتاردان، ساياسي پارتيالاردان، قوعامدىق ۇيىمداردان جانە ساراپشىلاردان تۇسكەن بارلىق ۇسىنىستاردىڭ نەگىزىندە ازىرلەندى. باقىت نۇرمۇحانوۆتىڭ ايتۋىنشا، جاڭارتىلعان كونستيتۋسيا جوباسىندا پرەامبۋلا، 11 ءبولىم جانە 104 باپ بار. "حالىق كەڭەسى" جانە "كونستيتۋسياعا وزگەرىستەر مەن تولىقتىرۋلار ەنگىزۋ" اتتى ەكى جاڭا ءبولىم ەنگىزىلگەن. تاعى 4 ءبولىمنىڭ اتاۋى وزگەردى.
جالپى، وزگەرىستەر مەن تولىقتىرۋلار اتا زاڭنىڭ بارلىق بولىمدەرىن قامتىپ، 77 باپقا تۇزەتۋلەر ەنگىزىلدى. بۇل كونستيتۋسيا ءماتىنىنىڭ 84%-ى.
"ۇسىنىلعان وزگەرىستەر – ماڭىزدى ءارى اقىلعا مۇقيات سالىنعان قادام، ولار تۇجىرىمدامالىق تاسىلدەردى وزگەرتىپ، قۇقىقتىق دالدىكتى نىعايتىپ، كونستيتۋسيانىڭ ساپاسىن ارتتىرادى"، – دەپ اتاپ ءوتتى كونستيتۋسيالىق كوميسسيانىڭ مۇشەسى.
جيىنتىق جوبا بىلىكتى زاڭگەرلەر مەن لينگۆيستەردەن قۇرالعان جۇمىس توپتارىندا قاتار پىسىقتالۋدا.
باقىت نۇرمۇحانوۆتىڭ ايتۋىنشا، ماماندار كونستيتۋسيانىڭ نورمالارىن دۇرىس جازۋ، ماعىنالىق سايكەسسىزدىكتەر مەن قاراما-قايشىلىقتاردى، سونداي-اق تۇسىنىكسىزدىكتەردى بولدىرماۋ بويىنشا ۇلكەن جۇمىس اتقاردى.
جيىنتىق جوبادا ۇسىنىلعان نوۆەللالار قازاقستاننىڭ كونستيتۋسيالىق نەگىزدەرىن قامتىپ، ونىڭ كەلبەتىن تۇبەگەيلى وزگەرتەدى. بۇل تۇزەتۋلەر كوزدەلگەن ينستيتۋسيونالدىق جانە قۇرىلىمدىق رەفورمالار ءۇشىن ۇلكەن الەۋەتكە يە.
"ادام مەن ازاماتتىڭ كونستيتۋسيالىق قۇقىقتارى مەن بوستاندىقتارىن جۇزەگە اسىرۋ جانە قورعاۋ كەپىلدىكتەرى كۇشەيتىلىپ جاتىر. پرەزيدەنتتىك باسقارۋ فورماسىن ساقتاي وتىرىپ، مەملەكەتتىك بيلىك قۇرىلىمى ايتارلىقتاي وزگەرەدى"، – دەپ مالىمدەدى كونستيتۋسيالىق سوت ءتوراعاسىنىڭ ورىنباسارى.
سونىمەن قاتار، ول نەگىزگى وزگەرىستەردى دە اتاپ ءوتتى: جاڭا ءبىر پالاتالى پارلامەنت مودەلى ەنگىزىلەدى، ازاماتتاردىڭ مەملەكەتتىك باسقارۋعا قاتىسۋ مۇمكىندىكتەرى كەڭەيەدى، كونستيتۋسيالىق سوتتىڭ قۇقىق قورعاۋ تەتىكتەرى مەن اتا زاڭ نەگىزىندە قۇقىق ۇستەمدىگىن قامتاماسىز ەتۋ بويىنشا قىزمەتىنىڭ تيىمدىلىگى ارتادى.
باقىت نۇرمۇحانوۆتىڭ حابارلاۋىنشا، كونستيتۋسيالىق نوۆەللالار مەملەكەت ميسسياسىن، ونىڭ فۋنكسيالارىنىڭ مازمۇنىن، مەملەكەتتىك ورگاندار، قوعامدىق ۇيىمدار مەن ازاماتتار اراسىنداعى ءوزارا قارىم-قاتىناس قاعيداتتارىن جاڭا قىرىنان تۇسىنۋگە مۇمكىندىك بەرەدى، ازاماتتىق قوعام ينستيتۋتتارىن مەملەكەتتىك ماڭىزى بار ماسەلەلەردى شەشۋگە كەڭىنەن تارتۋعا جول اشادى.
"بۇل كونستيتۋسيا مازمۇنىنىڭ جاڭارۋى مەن تۇبەگەيلى وزگەرۋى تۋرالى ايتۋعا مۇمكىندىك بەرەدى"، – دەپ اتاپ ءوتتى ول.