الماتىنىڭ ا.پ.چەحوۆ اتىنداعى ورتالىق قالالىق كىتاپحاناسىندا كوكتەم مەرەكەسىنە وراي «ايەل – انا، ايەل – نۇرى عالامنىڭ» دەگەن تاقىرىپ شەڭبەرىندە اسەرلى كەش ءوتتى.
كىتاپحانانىڭ جاس وقىرماندارىمەن جۇزدەسۋگە «Almaty aqshamy» گازەتىنىڭ ءبولىم رەداكتورى، قازاقستان جۋرناليستەر وداعىنىڭ مۇشەسى نۇرجامال الىشيەۆا، بەلگىلى ءداستۇرلى ءانشى، قازاقستاننىڭ ەڭبەك سىڭىرگەن قايراتكەرى ايگۇل قوسانوۆا، رەسپۋبليكالىق «ايگولەك» جۋرنالىنىڭ ءتىلشىسى ايىم التاي قىزى جانە بۇركىتشى ارۋ اياجان دانيار قىزى شاقىرىلعان ەكەن.
قوعامنىڭ ءار سالاسىندا ەڭبەك ەتىپ جۇرگەن وسىناۋ نازىك جاندى مەيماندار ايەل-انانىڭ ورنى، قازاق قىزىنىڭ بولمىسى، سونداي-اق مەيىرىم، جىلىلىق، وتباسى، قازاقى قۇندىلىقتار تۋرالى ويلارىمەن ءبولىستى. وقىرماندار تاراپىنان قويىلعان ءتۇرلى ساۋالدارعا جاۋاپ بەرىپ، سىرلاسۋ كەشىن ودان ءارى ارلەندىرە ءتۇستى. وقىرمانداردى اسىرەسە، اياجان دانيار قىزىنىڭ ارىن اتتى بۇركىتى كوبىرەك قىزىقتىرعانداي. جاس قۇسبەگىنىڭ بۇل جولدى قالاي تاڭداعانىن سۇراپ جاتتى جاستار. ءبىز ەندى تانىلىپ كەلە جاتقان بۇركىتشى بويجەتكەنمەن الداعى ۋاقىتتا كەڭىرەك سۇحبات قۇراتىن بولامىز.
ۇكىلى دومبىراسىن قۇشاقتاي كەلگەن ايگۇل ءانشى مەرەكەلىك كەشتىڭ بوياۋىن قانىقتىرا تۇسكەن «ادەمى قىز» ءانىن شىرقاپ بەردى. ال ايىم ارۋ سياسى كەبە قويماعان ولەڭىن وقىپ بەردى.
مەيماندار مەن جاس وقىرماندار بىرىگىپ قىزىقتى ويىن وينادى. ول دا ەكى تاراپتى جاقىنداستىرۋعا دانەكەر بولعانى انىق. كەش سوڭىنا قاراي ارۋلارعا ەر ازاماتتار ءىلتيپات كورسەتتى. اتاپ ايتساق، جاس اقىندار ەرجان جۇمابەك پەن ماعاز رەتبەك قىز-كەلىنشەكتەرگە، ايەل-انالارعا دەگەن جۇرەكجاردى تىلەگىن جىر ارقىلى جەتكىزدى.
مەيماندارعا ۇسىنىلعان قىزعالداقتار دا كوكتەم جارشىسىنداي بولىپ جۇرەكتەردى جىلىتتى.