مەن – كىتاپحاناشىمىن. مەنىڭ كاسىبىم – مەن ءۇشىن تەك جۇمىس ەمەس، رۋحاني الەمگە اپارار جول، ىزدەنىس پەن تاربيە مەكتەبى. كىتاپ پەن وقىرماننىڭ اراسىنداعى التىن كوپىر بولۋ – مەنىڭ ومىرلىك ماقساتىم.
جاندار ساۋلە يلياس قىزى، الماتى ءسان جانە قىزمەت كورسەتۋ سالاسى كوللەدجىنىڭ كىتاپحانا مەڭگەرۋشىسى
كىتاپ – ادام جانىنىڭ ازىعى، رۋحاني بايلىقتىڭ قاينار كوزى. ول – ۇلتتىڭ تاريحىن، مادەنيەتىن، رۋحىن، تاعىلىمىن ساقتايتىن كيەلى قازىنا. ءار كىتاپ – ءبىر الەم، ءار بەتىندە ءومىردىڭ ءمانى مەن تاعىلىمى جاتىر. وقىرمان سول الەمگە ەنىپ، ءوي-ورىسىن كەڭەيتەدى، دۇنيەتانىمىن قالىپتاستىرادى.
ال كىتاپحانا – سول رۋحاني بايلىقتىڭ ورداسى. بۇل جەردەن تەك ءبىلىم عانا ەمەس، ادامگەرشىلىك، ءتارتىپ، مادەنيەت، ىزگىلىك ءنارى تارايدى. كىتاپحانا – حالىقتىڭ جانى، قوعامنىڭ ايناسى. مۇندا جاس ۇرپاق ءوز جولىن ىزدەيدى، ىزدەنەدى، ارماندايدى، ماقسات قويادى
مەن ءۇشىن كىتاپحانا – كۇن سايىن ءومىر قايناپ جاتقان ەرەكشە ورتا. مۇندا ءار وقىرماننىڭ ءوز تاريحى، ءوز ىزدەنىسى بار. ءبىرى ەمتيحانعا دايىندالىپ كەلسە، ەندى ءبىرى جان تىنىشتىعىن ىزدەيدى. ال كەيبىر جاستار جاڭا كىتاپتاردان شابىت الىپ، ءوز ارمانىن ۇشتاي تۇسەدى.
قازىرگى زاماندا تەحنولوگيانىڭ دامۋى، ينتەرنەت پەن الەۋمەتتىك جەلىلەردىڭ ىقپالى قانشالىقتى كۇشەيسە دە، كىتاپتىڭ قۇدىرەتى ءوز ءمانىن جوعالتقان جوق. كىتاپ – ماڭگىلىك ۇستاز. ول ادامدى سابىر مەن پاراساتقا، ويلاۋ مادەنيەتىنە باۋليدى. ال كىتاپحاناشىنىڭ مىندەتى – سول رۋحاني بايلىققا جول سىلتەپ، جاستاردى كىتاپ وقۋعا باۋلۋ.
مەن ءوز ىسىمە ۇلكەن جاۋاپكەرشىلىكپەن قارايمىن. سەبەبى ءاربىر كەلگەن وقىرمانعا دۇرىس باعىت بەرۋ، قىزىقتى كىتاپ ۇسىنۋ – رۋحاني تاربيە بەرۋدىڭ العاشقى قادامى. ءبىز، كىتاپحاناشىلار، جاستاردىڭ بويىنا كىتاپقا دەگەن سۇيىسپەنشىلىك ۇيالاتىپ، وقۋ مادەنيەتىن قالىپتاستىرۋعا اتسالىسامىز.
مەن كىتاپحاناشى رەتىندە ستۋدەنتتەرمەن ۇنەمى تىعىز بايلانىس ورناتۋعا تىرىسامىن. كىتاپحانا – تەك تىنىشتىق مەكەنى ەمەس، شىعارماشىلىق پەن ىزدەنىستىڭ ورداسى. مۇندا ءتۇرلى ادەبي كەشتەر، تانىمدىق كەزدەسۋلەر، پوەزيا ساعاتتارى، كىتاپ كورمەلەرى وتكىزىلەدى. وسىنداي شارالار ارقىلى ستۋدەنتتەر مەن جاستار ءوز ويلارىن ەركىن جەتكىزىپ، ونەرىن تانىتىپ، رۋحاني تولىسادى. اپتا سايىن توپ جەتەكشىلەرىمەن بىرلەسە وتىرىپ، ستۋدەنتتەردى كوپشىلىك كىتاپحاناعا اپارىپ، جاڭا ادەبيەتتەرمەن، كوركەم شىعارمالارمەن تانىستىرامىز. سونداي-اق كىتاپ كورمەلەرى، ادەبي ساعاتتار مەن وقىرماندار كلۋبتارىن ۇيىمداستىرىپ، ولاردىڭ كىتاپقا دەگەن قىزىعۋشىلىعىن ارتتىرۋعا كۇش سالامىز.
كوپشىلىك كىتاپحانا – تەك وقۋ ورنى عانا ەمەس، وي الماسۋ مەن وزىندىك كوزقاراس قالىپتاستىراتىن مادەني ورتا. وندا ستۋدەنتتەر تەك كىتاپ وقىپ قانا قويماي، پىكىرتالاسقا قاتىسىپ، ءوز ويىن ەركىن جەتكىزۋگە ۇيرەنەدى. ءبىز «كىتاپ – رۋحاني قازىنا»، «دوسىڭا كىتاپ سىيلا»، «مەنىڭ سۇيىكتى كىتابىم» سياقتى ءىس-شارالار وتكىزىپ، جاستاردىڭ شىعارماشىلىق قابىلەتىن دامىتۋعا ىقپال ەتىپ كەلەمىز.
كىتاپحانانىڭ ءار سورەسىندە عاسىرلار بويى جيناقتالعان دانالىق پەن ءبىلىم جاتىر. سول ءبىلىمدى وقىرمان جۇرەگىنە جەتكىزۋ – مەن ءۇشىن ۇلكەن مارتەبە. سەبەبى مەنىڭ ەڭبەگىمنىڭ ناتيجەسى – جاستاردىڭ كىتاپقا دەگەن قىزىعۋشىلىعى مەن ولاردىڭ رۋحاني بايلىعىنىڭ ارتۋى.
قورىتا ايتقاندا، كىتاپ – ادام ءومىرىنىڭ شامشىراعى، ال كىتاپحانا – سول شامنىڭ جارىعىن تاراتىپ تۇرعان وردا.
ءبىز، كىتاپحاناشىلار، رۋحانياتتىڭ قىزمەتشىسىمىز. كىتاپ ارقىلى سانا قالىپتاستىرىپ، جۇرەكتەرگە ىزگىلىك ۇيالاتامىز. كىتاپ – ماڭگىلىك قۇندىلىق. ال كىتاپحاناشىنىڭ ەڭبەگى – سول قۇندىلىقتى كەلەر ۇرپاققا جەتكىزۋ. ءار وقىرماننىڭ جۇزىنەن قىزىعۋشىلىق پەن ىزدەنىستى كورگەندە، ءوز ءىسىمنىڭ ماڭىزدىلىعىن سەزىنەمىن.
مەن ءۇشىن كىتاپحانا – رۋحاني تىنىس، ءبىلىم مەن تاربيە ورداسى. ستۋدەنتتەرمەن بىرگە ءار كۇندى كىتاپ الەمىندە وتكىزۋ – مەنىڭ ومىرىمدەگى ماقساتتارىمنىڭ بىرەۋىنىڭ ورىندالعانى دەپ بىلەمىن.سوندىقتان دا ءار ادام كىتاپحانانى ءوز رۋحاني وتباسىنداي كورىپ، كىتاپتى ومىرلىك سەرىگى ەتۋى كەرەك.