تۋريستەردى قۇتقارۋ ءۇشىن مي-8 تىكۇشاعى جىبەرىلدى
شقو وبلىسىنا قاراستى بەلۋحا تاۋىندا رەسەيلىك 2 الپينيست تۋريست قايتىس بولىپ، تاعى 2 ادام قۇتقارىلدى، دەپ حابارلايدى Almaty-akshamy.kz ق ر توتەنشە جاعدايلار مينيسترلىگىنىڭ باسپا ءسوز قىزمەتىنە سىلتەمە جاساپ.
«23 ماۋسىم كۇنى ساعات 10:00 شاماسىندا كاتونقاراعاي اۋدانىنىڭ قۇتقارۋشىلارىنا كوككول اۋدانىنداعى بەلۋحا تاۋىندا 4 الپينيست تۋريست قار كوشكىنىنىڭ استىندا قالدى دەگەن حابار ءتۇستى. اپات سالدارىنان 2 ادام قايتىس بولدى. بىرەۋى 1992 جىلى، ەكىنشىسى 1988 جىلى تۋعان. ودان بولەك 1990 جىلى تۋعان رەسەي فەدەراسياسىنىڭ ازاماتى زارداپ شەككەن جانە 32 جاستاعى ءبىر الپينيست امان قالدى»، - دەلىنگەن حابارلامادا.
اقپاراتتا ايتىلعانداي تۋريستەردى قۇتقارۋ ءۇشىن مي-8 تىكۇشاعى جىبەرىلگەن.
«وقيعا ورنىنا كەلگەن تىكۇشاق 1 مەتر بيىكتىكتە قالىقتاپ تۇردى. بۇل ساتتە قۇتقارۋشىلار قازا بولعانداردىڭ دەنەسىن بورتقا تيەدى. ال جاراقات العان ەر ادامعا العاشقى مەديسينالىق كومەك كورسەتىلدى»، - دەيدى ۆەدومستۆودان.
سونداي-اق، باسپا ءسوز قىزمەتى تىكۇشاقپەن قۇتقارۋ جۇمىسى 3000 مەتر بيىكتىكتە جۇرگىزىلگەنىن جانە اۋە كەمەسى بىرنەشە رەيس جاساعانىن حابارلاپ وتىر.
وسى ورايدا وڭىرلىك توتەنشە جاعدايلار دەپارتامەنتى تاۋداعى قاۋىپسىزدىك ەرەجەلەرىن ەسكە سالادى:
- مارشرۋتقا شىعار الدىندا تج قىزمەتىندە تىركەلۋ قاجەت. مۇندا ءسىز مارشرۋتتىڭ ەرەكشەلىكتەرى، باقىلاۋ ۋاقىتى جانە بايلانىس سيگنالدارى تۋرالى بارلىق قاجەتتى اقپاراتتى الا الاسىز؛
- ىڭعايلى كيىم مەن اياق كيىمدى تاڭداۋعا بايىپتى بولىڭىز؛
- وزىڭىزبەن بىرگە الىپ ءجۇرۋىڭىز كەرەك زاتتاردىڭ ىشىندە: جىلى زاتتار، ۇيالى تەلەفون ءۇشىن قوسىمشا قۋات كوزدەرى، شام جانە وت جاعۋعا ارنالعان قۇرالدار بولۋى كەرەك. سونداي-اق، GPS ناۆيگاتورىن وزىڭىزبەن بىرگە وتكىزگەن ءجون.
ساپاردا:
- قوزعالىس ءۇشىن ۇزاعىراق بولسا دا، ەڭ ءقاۋىپسىز مارشرۋتتى تاڭداۋ كەرەك؛
- قوزعالىس باستالار الدىندا ىقتيمال قاۋىپتەردى مۇقيات باعالاۋ، اۋا-رايى جاعدايلارىن جانە كەدەرگىلەردىڭ ىقتيمالدىعىن ەسكەرۋ قاجەت؛
- ءتۇرلى كەنەتتەن بولاتىن ءجاۇدايلارعا دايىن بولۋ قاجەت جانە ءقاۋىپ كەزىندە ۋاقتىلى ساقتىق شارالارىن قابىلداۋ كەرەك؛
- تەك توپپەن قوزعالۋ كەرەك؛
- ناشار كورىنگەندە (تۇمان) نەمەسە تاۋلىكتىڭ قاراڭعى ۋاقىتىندا وتپەۋ كەرەك؛
- ءقاۋىپتى جارتاستى جەرلەردەن وتپەڭىز. بوس جاتقان تاستارمەن بەتكەيلەر مەن ويىقتارعا وتپەڭىز.